Man City hnawl hnu De Bruyne a vul zel dawn em?

Mi bik a ni a, player naranin an tih theih lo tithei ṭhintu a ni - Manchester City chuan kum 34 mi Kevin de Bruyne chelh ai chuan an kaltir a, a club thar Napoli leh an ram Belgium tan a vul leh ta si, a vanglai a la liam lo emaw tih mai tur a ni.

Man City khan a contract an pawtsei lo a, man nei loin Napoli a zawm a ni. Pep Guardiola-a chelh loh hi Antonio Conte chuan duh takin a lo kuangkuah, Serie A leh Champions League lamah a hmuhnawm a, World Cup qualifying-ah Belgium timawitu a ni bawk.

Kum 34 mi De Bruyne hian, "Inelna sangah ṭha takin ka la khel thei niah ka ngai a, mahse club thutlukna hi ka zah a, ka pawm thiam mai a ngai a ni," tiin kumin April khan a sawi, a thu sawi ang tak hian inelna sangah a la khel thei.

Tun season kal laiah De Bruyne hian club leh ram tan match 12 a khelh aṭangin goal 11 laiah a inrawlh, goal riat khungin a ṭhiante khung tur vawi thum a siamsak bawk, rawlthar thil tih ni se la chuan hahipa sawi tham a ni ngei ang.

Nipui bazar lai khan Man City hian De Bruyne bakah Ederson, Jack Grealish, Ilkay Gundogan leh Kyle Walker te an chhuahtir a, an hmun ruak hnawh khat tura an lakte che ṭha thawkhat mah se, tun hma lama team nghet leh hmuhnawm ang kha chu an la ni chiah lo.

A bikin De Bruyne hmun ruak a zau, tuna Man City midfielder zingah Jeremy Doku chu goal thawk chhuak hnem ber niin, goal thum a khung bakah assist vawi li a nei bawk a, ani pawh hian KDB chu a la phak chuang lo a ni.

De Bruyne khelhna Napoli hian zanin dar 9:30 hian Serie A match khel turin Torino an lenchilh dawn - match ruk an khelh tawh china hmahruaitu an ni bawk a, inrintawkna sang tak nen khualmual an tlawh ang, international match zawh hlim a nih avang erawh chuan fimkhur a ngai dawn a ni.