Enzo-a'n Forest hmachhawn thei dawn

Chelsea midfielder pawimawh Enzo Fernandez chuan khup hliam vangin international break-ah Argentina squad zawm thei lo mah se, vawiin tlai dar 5:00-a Nottingham Forest nen an inkhelh hunah erawh a inlan thei dawn.

Argentina chuan international break-ah khan thuchhuah siamin, "Enzo chuan a khup lamah harsatna a neih avangin international break-ah Argentina squad a zawm ve thei dawn lo," an ti a, mahse, a lam hnaite chuan Argentine midfielder hian chawlh a tum sa hrim hrim niin an sawi.

Kum 24 mi Enzo hian Chelsea-ah khaipa dinhmun luah chhoin, tun season-a league match sarih an khelh tawhah goal thum khungin, assist vawi khat a nei bawk a, mahse, Club World Cup a khelh chauh avangin tun season a la chawl meuh lo.

Hei vang hian Enzo-a'n chawlh hahdam mamawh niin a inhria a, international break a chawl pawh a demawm hran lo. Chelsea player zingah Enzo mai ni lo, Moises Caicedo, Joao Pedro leh Reece James te pawhin international break-ah an ram jersey ha loin, hahdamna hun an nei vek a, Liverpool hneh hlim an nih bawk avangin an phur hle.

Blues hian Liverpool kha player inhliam pariat nei chungin an hmachhawn a, tunah erawh player ṭhenkhat hahdamin, hliam vanga chawl zingah Tosin Adarabioyo leh Wesley Fofana ten dam lam an pan tawh a, an thiampuipa Cole Palmer erawh kar ruk dang tal a chawlh a la ngai dawn!

Hetihrual hian zanina Chelsea lenchilh tur Nottingham Forest hi an talbuai vanglai tak a ni a, coach thar Ange Postecoglou kaihhruaina hnuaiah inelna hrang hrangah match sarih enkawl tawhin, a la chakpui miah lo!

Hei vang hian Forest chuan season hmasaa Europa League nomawi chawitu coach hi ban mai an rilruk leh der tawh niin an sawi a, Chelsea laka an tlawm chuan Postecoglou-a'n puanthuah tela Forest a chhuahsan maina chance a sang hle.

Hei tak hi Chelsea tan erawh a harsa tur lai a ni - Forest hi dam khawchhuah hram tuma bei tur an ni a, thapui thawhin an ṭang dawn a, hei tak hi Blues tan inbuatsaih ngaihna lai tur niin a lang.