Marquez a chawlh rih a ngai - Doctor

Marc Marquez chu a hliam vangin a chawlh deuh rih a ngai dawn. Tun hnaia a chetsualna vangin enkawl mek a ni a, Pathianni zan dar 8:30-a Australia Grand Prix an tlan hnuah pawh Ducati test rider Michele Pirro chuan a hmun ruak a luah ang.

Indonesian Grand Prix-ah khan Marco Bezzecchi nen an intihpalh vangin a dar ding lam a hliam. Amah enkawltu MotoGP medical chief Dr. Angel Charte chuan, "Marc-a hliam chu hlawhtling taka zai a ni a, mahse tunah chuan intlansiak leh nghal chi a ni lo.

"A dam leh thuai theih nan theihtawp chu kan chhuah, amaherawhchu hliam hian dam turin hun a mamawh ve ṭhin. Tun hmain hliam vangin rei tak chhung harsatna a lo tawk tawh, hun rei lo zawka ngai a awh leh theih hi kan duh.

"A lo kir hun tur tak sawi theih ni lo mah se, a lan dan chuan November tir lama Portugal Grand Prix tlan a nih hunah pawh a la inlan ve theih ka ring lo," a ti. Marquez hi a champion chiang tawh a, point hmuh belh tawh lo pawh ni se a dinhmun a chiang.

Mahse, bike intlansiakna sang berah hian vawi 89 chak tawh Valentino Rossi-a record chu a um mek - Spanish rider Marquez hi vawi 73 a chak tawh thung a, kum 32 mi chauh a la nih avangin chak hnem ber ni turin hun a la nei dawn niin a lang.