Champion zia neitu Arsenal

Arsenal-in Premier League table chung bera awm turin Inrinni zan khan Fulham 1-0 in an hneh a, goal awmchhun hi Leandro Trossard-a khung a ni. Mikel Arteta hoten match riat aṭangin point 19 an hmu a, an squad a chhah bakah an khel a ngheh ṭhat avangin kum 2004 hnua champion inbeiseina an nei lian hle.

Gunners hian October 21, Thawhlehni zan dar 12:30 hian Atletico Madrid an mikhual dawn a, Arteta hote hi Champions League-a match hnih khelhah an la chak ve ve. Premier League lamah Arsenal fixture a nem rih dawn; Crystal Palace, Burnley leh Sunderland te an hmachhawn chho dawn a, pakhatna dinhmun sawhngheh theihna remchang an nei ang.

Vanduai zan?

Craven Cottage-ah Arsenal-in ball an chang tam nghal a, an goal bawh erawh a na nghal lo. Mahse, minute 16-naah mikhual team hian mawi zetin Fulham tlarhnung an ṭhiat a, Trossard-a ball pek chu Riccardo Calafiori-a'n vawi khatah kawh zetin a pet goal nghal. Mahse, goal ropui hi offside vangin pawm a ni lo a, Italian defender hi a lo pawng hret.

Arsenal-in goal khung tura an lak Viktor Gyökeres vanneih zan a ni lo a, first half-a a chance ṭha chu goal-ah pet mah se Fulham keeper Bernd Leno-a'n a dang. Hemi hnu hian Calafiori leh Declan Rice ten box pawn aṭangin goal zawn loah an pet ve ve.

Bukayo Saka a hmuhnawm a, English forward thawhrah hi Martín Zubimendi-a'n a khung thei lo. Fulham lam tan Harry Wilson a hlauhawm ve reng bawk a, Arsenal vanduai zan thleng thei a ni. Second half-ah pawh Saka-a'n penalty a hlawh chhuak tawhah inngai mah se VAR hmanga ennawn hnuah referee-in a thutlukna a sut kir.

Set Piece

Arsenal hi Arteta hnuaiah hma an sawn a, set piece-ah hma an sawn lehzual. Fulham laka an chakna pawh corner kick a ni a, Saka corner pet chu Gabriel-a'n tauh pialin, far post-a awm Trossard-a'n a minute 58-naah a su lut.

Gunners hian tun season-ah set piece aṭangin goal riat an khung tawh a, chung zinga goal sarih chu corner kick aṭangin a ni. 2021-22 season aṭanga chhiar khan Arsenal hian set piece aṭangin goal 63 an khung tawh a, Premier League club dang zingah goal 47 aia tam set piece aṭanga khung an awm lo.

Arsenal hian goal khung belh tawh lo mah se nuam sa takin hnehna an chang a, an chakna kawngah set piece a pawimawh. Arteta hote hian inelna hrang hrangah match riat chhung chak loh an nei lo a, inrintawkna an nei chho mek bawk.

Fulham an hmachhawn ṭum hian hliam vangin captain Martin Odegaard an chhawr thei lo a, a aia lut Eberechi Eze a rintlak. Norwegian midfielder Odegaard hi chawl rei deuh pawh ni se Eze bakah player ṭha dang an kawl avangin buaina tur an nei niin a lang lo.