Amateur boxing hmasawn nan MoU an ziak

Mizoram Boxing Association (MIZBA), Sailo Agencies, Zonet leh Vanglaini te chuan October 17, Zirtawpni zan khan Mizorama amateur boxing hmasawn theih nana hma la ho turin thawh hona thuthlung (Memorandum of Understanding) an ziak.

MoU hi MIZBA president C. Lalṭanpuia, Sailo Agencies neitu G. Ṭhuamluaia Sailo, Vanglaini editor Lalnunpuia leh Zonet TV Pvt. Ltd. director LV Lalthantluanga ten hming an ziah hnan.

MIZBA president C. Lalṭanpuia chuan, "Mizorama sumdawnna leh media lama langsar ber ber te leh MIZBA ten thawhhona thu kan thlung thei hi Amateur Boxing leh Mizoram tan chanchinṭha a ni," tiin a sawi a, amateur boxing-in hma a sawn ngei a beisei thu a sawi.

Boxing hi Mizote ṭhatna nia sawi ni mah se National Boxing Championship-ah record a nei ṭha tawk lo a, amateur boxing hi National Games thlenga Mizoram tan medal beisei theihna a nih avangin tun ṭuma an thuthlung ziah hi Mizoram boxing hmel thlak danglam theitu a ni.

MIZBA, Sailo Agencies, Zonet leh Vanglaini te ṭangkawp hian November 14 - December 10, 2025 chhung hian R. Dengṭhuama Stadium, Mualpuiah Amateur Boxing Championship an buatsaih nghal dawn.

Inelna hi 9th Elite National Boxing Championship-a Mizoram aiawh tur boxer thlanna a nih nghal dawn avangin amateur boxer tan a pawimawh dawn hle.