Tlai dar 3-ah Kanan vs SYS

GIG Motors MPL12-ah vawiin tlai dar 3:00 hian tla tawh SYS FC leh relegation playoff khel tur Kanan FC te an inkhel dawn. RG Stadium-a inkhel tur hi pawimawh angin lang lo mah se SYS FC tan mualpho lutuk tur hliah khuh nan chak a ṭul thung.

SYS hian tun season-ah chak an la nei lo a; vawi 13 khelhah vawi 12 an chak lo a, Mizoram Police lakah point khat an hlawh chhuak. Lunglei club hi a ṭha lo zawnga MPL record siam thei dinhmunah an ding a, Kanan laka chak hmel an hmu lo a nih chuan record thar an siam dawn.

MPL3-a khan Lunglei FC chuan point li chiah an hmu a, SYS tan record nih rual pawh hi a harsa dawn. Player naupang rual khingpui tur Kanan FC hi an squad thlir chuan semifinal khel thei tur khawpa ṭha niin lang mah se MPL-a tawnhriat an la neih lohna a lang.

Kanan hian Chawngthansanga hoin bul an ṭan a, match riat aṭangin point sarih an hmu. Semifinal luh beiseina chhi nung tur leh relegation playoff pumpelh turin Samson Ramengmawia an la lut a, an beisei ang result an hlawh chhuak lo - match nga aṭangin point hnih chauh an hlawh chhuak. Samson-a hnuaiah Kananin chak hmel an la hmu bik lo a, vawiin tlai hian SYS lakah chak ngei an tum ang.