Vawiinah MFA U17 quarterfinal khel dawn

Mizoram Football Association buatsaih Zawlbuk Zodin Memorial MFA Under 17-ah player registration fel loh vangin team pariat paih an ni a, player khel tur nei daih team pariatten vawiin hian quarterfinal an khel ang.

MFA Under 17-ah hian team 16 an tel a; chung team te chu group paliah ṭhen an ni. Group A-ah Lushai Corner, SL9 FA (Zemabawk North), Aizawl FC leh Chanmari FC te an awm a, group B-ah Sairang FC, 4 Brothers Academy, Dinthar FC leh Mizoram Police te an awm.

Group C-ah MLS FC, Aibawk Zone FA, Greenfield FA (Tuithiang) leh Saikhamakawn te an awm a, group D-ah Kanan FC, MSSC NRC, Beck's FA (Tanhril) leh SYS FC te an awm. Inelna hi October 14, Thawhlehni aṭang khan ṭan a ni a, kum dik lo leh document dik lo vangin round hmasa ber aṭangin buaina a awm ṭan a, MPL Board tana thutlukna siam harsa khawp a awm.

Inelnaah hian CRS/CMS hman a ni a, team 16-te hi October 9, 2025 thleng tifel tura hun pek an ni. October 10, 2025-a manager's meeting-ah club tam zawk an inpeih hman loh avangin October 17, 2025 thleng pawhsei leh a ni.

MPL Board chuan October 17, Zirtawpni zan dar 12:00-ah CMS a khar a, an rel tawh angin 'active player regulations' anga khel thei nei chu club pariat (8) chauh an ni. Heng player zingah pawh hian player 11 nei daih lo an awm.

Ti fel hman lo zingah Mizoram chhunga football inelna changtlung bera ngaih SYS FC an tel a, anni bakah hian Mizoram Police, MLS FC, SL9 FA (Zemabawk North), Sairang FC, Greenfield FA (Tuithiang), Kanan FC leh Beck's FA (Tanhril) ten an khel zui thei dawn lo. Club leh player-ten inelna hmachhawn tura an thawhrimna leh sum sen chu a huna document tih fel loh avangin engmah loah a chang a, tualchhung football tan thil pawi tak a ni.