Potter-a'n Sweden a enkawl dawn

West Ham ban tak coach Graham Potter chu hna nei loin a awm rei dawn lo. English coach hian Sweden national team enkawl tura sawmna chu a pawm dawn a, he thuziak i chhiar meuh chuan an inrem tawh hial mai thei.

Kum 50 mi Potter hian Jon Dahl Tomasson a thlak dawn a, Danish striker lar ṭhin hian World Cup qualifier khelh mekah Sweden hi match li khelhpui tawhin, chak an la nei miah lo a, kar hmasa khan Kosovo laka 1-0 a an tlawm hnuah ban a ni.

Sweden hian automatic qualification an beisei thei tawh lo. Europe-a World Cup qualifier-ah hian group tina hmahruaitu ṭheuh chu World Cup khel tur hian an tling a, pahnihnaten playoff hmangin chance an la nei leh dawn bawk.

Sweden vanneihna erawh pahnihna an nih phak loh pawhin, 2024-25 Nations League-a an group hmahruaitu an nih avangin playoff an la khel thei dawn a, Potter-a hoin World Cup inpetkai hram an beisei dawn.

Potter hi a contract rei zawng tur tarlan a ni lo a, result-a zira pawhsei theih tur a nih a rinawm. Chelsea boss hlui hi September khan Hammers-in an ban a, match 23 a kaihhruai hmanah vawi ruk chiah hnehna a chanpui.

Mahse, Sweden-a awm laiin Potter hian a hming a chher a, fourth division club nia a enkawl Ostersund chu top flight league a hruai thleng thei - season li a enkawl chhungin vawi thum a kaisanpui a ni.

Brighton & Hove Albion leh Swansea City-ah hming a chher tawh bawk a, Hammers-in duh lo mah se, Sweden erawhin 'enchhin' an hnial lo.