PSG chak zo lo; goal li khungtu Greenwood

Season hmasa treble champion Paris Saint-Germain tan engkim a awlsam vek bik lo - Zirtawpni zan khan an mikhual Strasbourg nen 3-3 in an inhnehtawk a, Marseille an lo chak bawk si avangin Ligue 1-ah hmahruaitu an ni ta lo.

PSG hian minute rukna lekah Bradley Barcola hmangin goal hmahruai khung mah se, Strasbourg-in Joaquín Panichelli-a goal hnih leh Diego Moreira goal hmangin an chhanglet a, Europe-a team hmuhnawm ber pawl an hre ve lo.

Mahse, Paris club tan Gonçalo Ramos (penalty) leh Senny Mayulu ten goal khat ve ve khung ve lehin, 3-3 in inkhel a tawp. PSG chak zawh loh thu hre sain Marseille an inlan a, 6-2 in Le Havre an sawp.

Marseille tan Mason Greenwood-a'n goal li a khung a, Robinio Vaz leh Michael Murillo ten goal khat ve ve an thawh bawk - Le Havre tana Yassine Kechta leh Abdoulaye Touré goal khungin awmzia a nei phak lo.

Le Havre hi an centre back Gautier Lloris chu minute 34-naah hnawhchhuah a ni a, hetihlai hian 1-0 a hmahruaitu zawk an ni! Player kim loa an khelh hnuah goal ruk an chhuah a, Marseille-in PSG tlanpelin, Ligue 1 table chung ber an luah zui.