Napoli an tlawm; Inter an chak!

Serie A hmahruaitu leh champion lai Napoli chuan Inrinni zan khan khualmualah Torino an lenchilh a, 1-0 in an tlawm. Hetihlai hian Inter Milan chuan AS Roma 1-0 in an hneh thung a, table chung berah an awm ve leh ta thung.

Napoli-in player inhliam an ngah a, hliam langsar an neih sa Romelu Lukaku, Stanislav Lobotka leh Amir Rrahmani bakah Serie A Player of the Year ni lai Scott McTominay leh tun hnaia 'form' em em mai Rasmus Hojlund te an chhawr thei lo.

Antonio Conte naute an player langsar tel loin an che hleithei lo a, minute 32-naah Torino tan Giovanni Simeone chuan inkhela goal awmchhun a khung - hun tawp thlengin goal dang a lut tawh lo a, 1-0 in Torino an chak.

Torino tana goal khungtu Simeone hi Atletico Madrid coach Diego Simeone fapa a ni a, a nihna takah chuan Napoli player a la ni. Mahse, Serie A champion hian loan-in Torino-ah hian an kaltir a, season tawpah an duh chuan a nghetin an la thei dawn bawk.

A tawpah chuan amah mamawh lotu Napoli lakah goal a khung a, minute 62-naa lakchhuah a nihin club pahnih fan-ten ding chungin an thlah - a khelh ṭhat em avangin a phu thlawt.

Napoli chak loh thu hre sain Inter Milan an inlan a, khualmualah an elpui AS Roma chu 1-0 in an hneh - Ange-Yoan Bonny chuan inkhela goal awmchhun a khung a, Milan khaw club a chakpui.

Inter, Napoli leh As Roma te hian point 15 ṭheuh an nei a, goal difference avangin Inter hian table chung ber an luah.