Lampard enkawl Chelsea an tlang

Inrinni zan FA Cup fourth round inkhelah Chelsea chuan Hull City 2-1 a hnehin fifth round an lut; Premier League club dang Leicester City pawhin Brentford lakah hnehna an chan laiin Tottenham erawh an chak zo lo thung.

Jose Mourinho enkawl Spurs hi an mikhualna ramah Southampton nen 1-1 in an inhnehtawk a, chak tura ngaih an nih hnuah hun tawp dawna an tlarhnung a pawp leh avangin replay an khelh a ngaih phah dawn a ni.

Blues an chak

Championship club Hull khelmualah mikhual Chelsea an tlangnel, minute rukna lekah Michy Batshuayi pet chu Ryan Tafazolli-a'n lo dang pialin goalkeeper George Long tan dan hman a ni tawh lo.

Inkhel thununtu Blues lamin second half minute 64-naah Fikayo Tomori hmangin goal hnihna an khung a, hun tawp dawnah Hull lamin Kamil Grosicki hmangin chhang let ve mah se awmzia a awm tawh lo - Hull hian FA Cup bika Blues an hmachhawn vawi 11-ah chak an la nei miah lo.

Frank Lampard-a enkawl Chelsea hian February 1 hian Premier League lama an chunga awm Leicester City an tlawh zui dawn a, a sang pali zinga an dinhmnun sawhnghet turin chak ngei an tum ang.

Second half-a Son Heung-min goal hmangin Tottenham lamin an dinhmun siam ṭha mah se hun tawp dawnah an tlarhnung a pawp leh a, minute 87-naah Southampton tan Sofiane Boufal chuan si phurh sutin 1-1 in an inhnehtawk.

Spurs manager Mouriho chuan, "Hnehna kan chang teuh hle, kan inhnehtawk avangin team dang aiin match khata kan khelh tam a ngai dawn. Hahthlak deuh mah se tlak ai chuan inkhelh tam chu a ṭha zawk, chutih rualin match khata chinfel theih nise chu duhthusam a ni," a ti.

Inkhel dangah Leicester City chuan Kelechi Iheanacho goal khat hmangin Championship club Brentford chu 1-0 in an hneh. Manager Brendan Rodgers-a'n a player ṭha ṭhenkhat chawlh hahdamtir mah se an tlang tho.