Kan fan-te tan a ni - Amorim

Manchester United manager Ruben Amorim chuan Liverpool an hneh chu fan-te tan a hlan a, hun harsaah pawh club an thlawp tlat ṭhin avangin lawmthu a sawi.

Portuguese manager chuan, "Manchester-ah hian hnehna ka la chang tam lo tih ka hria a, Grimsby leh Brentford laka an thil hmuhte khan fan-te pawh a tihnual hle. Mahse, vawiinah chuan team dang daih an hmu a, hei hi an tan ka hlan a ni," a ti.

Amorim chuan Liverpool hneh chu United a enkawl hnua result a neih ṭhat ber a nih thu sawiin, "United ka enkawl hnua hnehna kan chan tawhah chuan ka la ngaihlu ber hial ang. Tunah hian harsatnate a kiam nghal em? ka sawi thei lo. Mahse, vawiina kan khelh anga kan training leh match-ah te kan khelh chhunzawm zel chuan, match tam takah hnehna kan chang ang.

"Chumi chhunzawm tur chuan theihtawp kan chhuah zel a ngai a, tunah chuan Brighton & Hove Albion chiah kan thlir ang a, chumi zawhah kan kal zel dan tur chu kan thlir leh thei ang," a ti a, hma hun sawi lawk vak a duh lo.

Kum 40 mi coach chuan media ho kap zuiin, "Krismas thleng bak a daih lo ang, tiin ka chanchin hi tam takin in sawi a, mahse, fan-te erawhin min thlawp reng. Min hmuh dan thlak miah lo ula ka duh a, chu chu ka tan a ṭha berin ka hria," a ti!

Amorim chuan chakna goal khungtu Harry Maguire fak zuiin, "United-ah hian pressure a tam em em a, he club tana khelh hi a namai lo hle. Harry Maguire hi kan tana player pawimawh a ni a, a hun thim paltlang zozai hi en u la, midangte tana entawn tlak khawpa rilru paukhauh a ni," a ti a, English centre back a fak.