MFA-in U17 League-ah zahngaihna lantir

Zodin Zawlbuk MFA Under 17 League-ah CRS/CMS hman a ni a, hun tiam chhunga tifel hman lo team pariat chu khel thei lo turin an hrem. Nimin lamah quarterfinal khelh tur ni mah se MFA-in an thutlukna sutin team tifel hman lote chungah zahngaihna an lantir a, inkhelhna hun an siamsak vek dawn.

MFA chuan, "CRS AIFF Pending a tam avangin Club pakuain ngenna an rawn siam chungchang chu MFA-in uluk takin a ngaihtuah a, club hian CRS tihna atan hian AIFF lamah sum tam tak an sen tawh avangin, quarterfinal-a CMS Active chauh inlan tawh tura tih chu club tam zawk dinhmun leh sum tam tak lo sen tawh ngaihtuahin, League Round 3 a khelh leh phawt nise," tiin thuchhuah an siam.

Inelna hi vawiinah khelh chhunzawm a ni nghal dawn a, MFA-in thutlukna siam fuh tawk lo an sut leh hi tualchhung football tan chanchin lawmawm a ni. Tuna thutlukna tharah chuan dan bawhchhe lo naupang hoin an tuar ve dawn ta lo a, an duh ber football an khel thei dawn.

Quarterfinal hi October 24 leh 27-ah khelh a ni ang a, semifinal leh final hi November 1 leh November 4-ah khelh a ni ang.