Samson-a hnuaiah Kanan an chak

GIG Motors MPL12-ah Kanan FC-in Samson Ramengmawia hnuaiah chak hmel an hmu ta a, nimin tlai khan SYS FC 3-1 in an hneh. Lunglei club SYS erawhin tun season-ah point khat chiah an hlawh a, season khata point hmu tlem ber record an siam thung.

RG Stadium-a inkhelah SYS-in Vanlalramnghaka hmangin goal khung hmasa mah se Kananin Lalthanzuala goal hnih leh F. Lallawmkima hmangin an lehthal. Kananin point 13 hmuin Mizoram Police nen an point hmuh zat inang mah se head to head-a an tluk loh avangin relegation playoff an khel ang.

SYS-in season hmang ṭha lo mah se Ramnghaka erawhin a theihna a pholang a, Zohnuai tlangval hian minute 10-na lekah ṭha taka la lutin goal mawi a khung. Kanan an insiamrem a, J. Lalbiakliana'n goalkeeper chauh a hmachhawn hnuah a khung lo. Samson-a hoten chance ṭhahnem tak an hlah hnuah injury time-ah TZ-a'n siphurh sutna goal a tauh lut.

Second half-ah Kananin team ṭha zawk an nihna an pholang a, minute 71-naah Lalthlanawma ball vawrhluh chu Lawma'n a pet goal. SYS lamin siphurh sutna remchang nei mah se an sut thei lo a, minute 85-naah TZ-a'n chak nemnghehna goal a tauh lut.

Samson-a hote hian relegation playoff-ah MPL Qualifier-a pahnihna an hmachhawn dawn. Qualifier hi Aizawl DFA hnuaia club pahnih Ramhlun North leh Ramthar ten an hmachhawn dawn a, hemite inkhela chak lo zawk hi playoff-ah an hmachhawn ang. Kanan tan MPL khelh zel theihna kawng a inhawng zau hle.