Juve tlawm niah Milan an chak

Pathianni zan Serie A inkhelah Juventus chu Como lakah 2-0 in an tlawm a, inkhel dangah AC Milan chuan Fiorentina chu 2-1 a hnehin table chung ber dinhmun an luah leh ta a ni.

Igor Tudor-a enkawl Juventus hi tun hnaiah an che hleithei lo, inelna hrang hrangah a zawnin an khingpui te vawi nga an inhnehtawkpui hnuah Como an tlawh a, an vannei seng tawh bik lo.

Minute lina lekah Marc-Oliver Kempf chuan Nico Paz hnen aṭanga a ball hmuh a khung a, chawlhlawk hmain Turin club hian Jonathan David hmanga sutah inngai mah se offside vanga hnawlsak a ni.

Second half tir lamah goal khungtu Kempf chu hliam vanga enkawl a ngai a, mahse a khel chhunzawm thei. Minute 79-naah goal hamsa zawk siamsaktu Paz chuan an goal hnihna leh chak nemnghehna a khung a, team lian lakah point thum an hlawh chhuak.

Argentina attacking midfielder Nico Paz hian season a hmang ṭha takzet, tun season chhunga Como-in league goal kua an khung tawh zinga pariatah a inrawlh, goal li khungin vaiw li bawk assist a nei, goal khatah chiah a inrawlh lo tihna a ni.

Italian chanchinbute chuan Juventus coach Igor Tudor chu ban mai theih dinhmunah ding niin an ziak, an match hnuhnung paruka chak ni hmel an hmuh tak loh avangin club director Damien Comollin leh Tudor te hi an boruak a ṭha tawk lo.

Inkhel dangah AC Milan erawhin Rafel Leao-a goal hnih hmangin Fiorentina chu 2-1 in an hneh, mikhual Fiorentina tan Robin Gosens chuan goal khung hmasa mah se an hum thei lo - Milan hian goal hnihin an vaw let a ni.

AC Milan coach Massimiliano Allegri chuan, "Fiorentina hi team ṭha an ni a, goal an rawn khung pawh kha a mak hran lo. Goal kan chhuah hnua kan beih let dan khan min tilawm, chak duha kan tuihal chhung chuan result kan nei ṭha ang," tiin a sawi.

Serie A match sarih an khelh aṭangin Milan hian point 16 an hmu a, table chung berah an awm - anmahni hnaih bertu Inter Milan bakah Napoli leh AS Roma te chuan khelh zat inangah point 15 ṭheuh an hmu thung, vawi khat chetsual lekah an dinhmun a inthlak vek thei.