Verstappen-a beiseina a sang zel

Formula 1 season tawp inum boruak a sang chho takzet a, champion lai Max Verstappen chuan nomawi humhum turin kawng a la inhawng niah a ngai - Pathianni zana tlan zawh tak United States Grand Prix-ah khan Verstappen hi a chak a ni.

Circuit of the Americas-ah Verstappen um phaktu an awm lo, Dutch tlangval hi season tir lamah che ṭha lo mah se tun hnaiah a insiamṭha a, a tan kawng a inhawng zau leh ta hle - intlansiak hmabak panga an la nei.

Red Bull driver Verstappen hian point 306 a hmu tling ta a, a chungah hian hmahruaitu Oscar Piastri (346 points) leh Lando Norris (332) te an awm. Intlansiak pakhatah point 25 lai a hmuh theih avangin inlehpelhna hun a la tam hle.

World champion vawi li ni tawh Verstappen chuan, "Champion turin kawng a la inhawng, chu chu chiang takin ka hmu a ni. Tun ṭuma kan intlansiak ang hi chawlhkar tawp dangah pawh a thlen leh theih ngei ka beisei," tiin a sawi.

Ocotober 26, Pathianni zanah Mexican Grand Prix an tlan leh dawn a, chumi hnuah South American ram Brazil-ah inelna an nei chhunzawm leh ang.