Aston Villa lakah Spurs an tlawm

Coach thar Thomas Frank-a hnuaiah Tottenham Hotspur-in beisei ang result an nei reng thei bik lo a, tun season-a beisei phak lo team Aston Villa chu Pathianni zan khan 2-1 in an ngam lo.

Spurs hian minute ngana lekah Rodrigo Bentancur hmangin goal hmahruai an khung a, mahni muala khel an nih bawk avangin awlsam takin an chak mai dawn niah an inngai hman.

Mahse, London club beisei ang ngawt erawhin thil a kal lo. Minute 37-naah Morgan Rogers chuan si phurh sutna goal a khung a, match 20 hnua Villa tana goal a khung leh hmasak ber a ni!

Goal dang lut loin chawlhlawk hman a ni a, mahse, second half-a goal khungtu chu Villa zawk an ni - Emiliano Buendía chuan minute 77-naah mikhual team goal hnihna a khung a, Spurs-in an chhanlet theih loh avangin Villa an chak.

Spurs hian warm up laiin captain Cristian Romero chu hliam vangin an chân a, an tlawm bawk. EPL match riat khelh tawhah Spurs hi vawi li chiah an la chak a, vawi hnih draw neiin, vawi hnih an tlawm tawh thung.

Villa hi an league match hmasa pangaah an chak zo lo a, tunah erawh match thum a zawnin an chak ta. Spurs boss Thomas Frank leh Villa manager Unai Emery te vawi ruk an intawnna niin, Frank hian Emery lakah hnehna a la chang ve miah lo!