Medvedev a champion ve leh ta

Daniil Medvedev chuan kum hnih a nghah hnuah champion nomawi a chawi ve leh ta - Russian star hian Pathianni zan khan Corentin Moutet chu 7-5, 4-6, 6-3 a hnehin Almaty Open nomawi a chawi.

Kum 2023 May khan Medvedev hian Rome Open title a la, a hnu lama tournament a khelh hoah final vawi ruk a lut leh tawh, heng hoah hian a chak lo vek! A tan hun duhawm a inherchhuak thei lo.

Tun season Australian Open-ah khan second round lekah a tla, hei mai bakah hian French Open, Wimbledon leh US Open-ah te hneh nei loin a tla vek, a tan kum ṭha lo tak a ni tlang mai dawn ni pawhin a lang hman.

Coach atan Thomas Johansson leh Rohan Goetzke te a la thar a, anni pahnih kaihhruaina hnuaiah hian Beijing leh Shanghai-ah semifinal a thleng a, hmasawn zelin tunah chuan nomawi a chawi ve leh ta a ni.

World number 14 Medvedev chuan, "Tun hnaia final ka khelh hote ka chhut kir a, ka duhthusam lo lai a tam ṭhin hle. Tunah erawh ka mangchhia aṭangin ka harh chhuak ta niah ka ngai," tiin a sawi.

Russian tlangval Medvedev hi tun kar chhunga khelh tur Vienna Open-ah a inlan zui leh nghal ang.