MLS-in history siamin semifinal lut

GIG Motors MPL12-ah MLS FC-in nimin khan MPL10 champion Mizoram Police 1-0 in an hneh a, HC Willis Byhna-a goal hmangin semifinal an lut. MPL history-ah Lawngtlai club hi Aizawl khaw pawn aṭanga semifinal khel thei hmasa ber an ni a, mellung phum puitu coach hi Lalruatliana Sailo (Tawia) a ni.

MLS hian point thum hlu tak an hlawhchhuah avangin point 21 an hmu a, Dinthar FC aia point an hmuhsan zawk avangin pathumna dinhmun an nemnghet. Lawngtlai club hian semifinal-ah Chanmari FC an hmachhawn ang.

Nimin inkhelah MLS-in bul an ṭan ṭha a, Freddy Lalrinkima'n chance ṭha an nei nghal a, box pawn aṭangin goal ruakah a khung thei lo. Mahse, chak mamawh MLS an ṭangulh a, Malsawmfela telna Police-in chance ṭha an ngah zawk. Lalbiakhlua'n (Biaktea) chance ṭha bik a nei a, crossbar a pet per.

Police tan semifinal beisei tur a awm tawh lo a, an relegate thei tawh lo bawk. Hetichung hian chak tumin Police an khel a, MLS tan harsatna an siam. Second half-ah coach Tawia'n Willis a rawn luhtir a, Siaha Vengpui tlangval hi danglamna siamtu a ni.

Minute 52-naah Rothangliana'n freekick a pet lut a, goal hlauhawm niin lang lo mah se Police keeper Muanawma'n a chhutsual a, Willis-a'n huaisen taka ball a tauh avangin goal pawimawh bik a khung.

MLS hian goal an khung hnuah nuam sain an chak lo a, hun tawp thlengin Police-in goal khung tumin an nawr. Hnai tak aṭangin Lalhmunmawia'n (Ahmuntea) crossbar a pet per a, MLS an him hram. Lawngtlai club-in MPL semifinal an khel dawn a, nimin lamah ṭantu an nei tam tawh a, league round-a an hneh tawh Chanmari FC an hmachhawn hunah an tam lehzual ang.

Nizan khan Aizawl FC leh Saikhamakawn FC an inkhel a, result kan hre hman lo. Saikhamakawn an chak a nih chuan semifinal an lut ang a, an chak zo lo a nih erawh chuan Dinthar FC-in semifinal an lut thung ang.