Real Madrid khelmualah Juventus an leng dawn

Zaninah Champions League khelh chhunzawm a ni dawn a, inkhel tur zingah zan dar 12:30-a Real Madrid-in Juventus an mikhual tur chu en châkawm a tling.

Champions League nomawi chawi ngun ber Real Madrid hi La Liga-ah table chung ber luahtu an ni mek a, Juve hian tun hma phak ta lo deuh mah se, club lian an nih miau avangin inkhel thawnthu ngaihnawmna a danglam dawn lo.

Xabi Alonso enkawl Real hian league match kua an khelh tawhah vawi riat hnehna chang tawhin, vawi khat chiah an la tlawm a, Juve erawh league match sariha vawi thum chiah la chak an ni thung!

Real fimkhurna

Madrid khaw club hian October 26, Pathianni zanah Barcelona mikhualin, El Clasico an khel dawn a, zaninah thapui thawh a, an ṭhat dan ber nena team rem mai chu Alonso tan a tih chi loh mai thei.

Real hian hliam vangin Antonio Rudiger, Dani Carvajal leh Dean Huijsen te an chhawr thei lo mek a, Trent Alexander Arnold-a'n training zawm leh tawh mah se, coach Alonso-a'n a dah ṭhat tur thu a sawi chiang tawh - El Clasico thlir tel a ṭul.Getafe laka lakchhuah ngai David Alaba pawh bench lama a awm a rinawm zawk.

Hetihrual hian tlarhmaah goal khung châka tuihal Kylian Mbappe chu bul ṭan ngei tura ngaih a ni a, French striker hian tun season-ah match 11 aṭangin goal 15 a khung der tawh - Vinicius Jr a la awm bawk.

Juventus hi

Real-in league-ah hma an hruai a ni mai lo a, Champions League lamah pawh match hnih khel tawhin, an la chak ve ve - Juventus nen an thawnthu a inang mawlh lo!

Juve hi an league match hnuhnung paliah an chak zo lo tawh a, UCL-a match hnih an khelh tawhah an khingpui an draw ve ve bawk - coach Igor Tudor ban an sawi ri ṭan tawh a, Italian club ropui hian insiamṭhat vat an duh.

Tudor tan Juventus enkawl a phu a ni, tih pholanna hun ṭha chu zanin hi a ni a, Santiago Bernabeu-ah Real Madrid an hneh theih chuan ban a ni lo tawp ang - Juve player-te tan an pu chhan hun a ni e.