Zo Clasico-ah Chanmariin Dinthar an sawp

GIG Motors MPL12-ah Chanmari FC-in Thawhṭanni zan khan Dinthar FC 6-0 in an sawp a, league winner ni pha lo mah se champion rinkai an nih chhan khelmualah an rawn lantir. RG Stadium-a inkhelah hian Lalpekhlua, KC Malsawmsanga, Lalrinchhana Tochhawng, Michael Lalbiaksanga, PC Rosangzuala leh Mesak C Lalrinngheta ten goal khat ṭheuh an khung.

Rochhingpuia hote hian match 14 aṭangin point 30 an hmu a, goal 32 khungin goal 10 an chhuah. Chanmarians hi MPL ṭantirh aṭangin an la tel kim vek a, season 12-ah a vawi li nan point 30 an hmu tling. Chak mamawh zawk Dinthar an zawr a, Chanmari an ngam loh deuh avangin Zo Clasico erawhin mipui beisei a pha lo hle.

Bul ṭan ṭha

Chanmari FC-in I Day Football-ah nomawi an chawi a, MPL-ah erawh beisei angin an khel ṭha lo. I League club hi league winner ni thei turin theihna nei mah se Aizawl FC an el pha lo a, nomawi hmasa zawk an chan. Mahse, nomawi hlu zawk chawi tumin an theihna an lanchhuahtir ṭan.

Zo Clasico-ah Dintharin semifinal lut turin chak an mamawh a, mahse inkhelh ṭantirh aṭangin Chanmariin an kat a ni ber. Minute lina lekah goal hmasa ber a lut a, Chanmarians hian vawi 17 an in pass a, player 10-in ball khawihin Lalpekhlua'n a hmawr a bawk. Bawngkawn tlangval Peka ball tauh a ṭha a, a siamtu C. Lalmuanpuia cross pawh ṭha tak a ni.

KC Malsawmsanga pawhin season chawhnu lamah harhtharna a chang a, minute 29-naah dinglam aṭangin ṭha zetin a pet lut. Chanmariin inkhel an thunun a, loan hmanga an lakluh Services captain Christopher Kamei chu game siamtu niin team angin football an khel a, langsar fal an awm lo.

An famkim lo

Chhinga hote an la famkim lo a, goal hnih an khung hnuah talbuai lai an nei a, Dintharin goal an khung teuh hle. Tea Chinzah-in Chanmari keeper Zothanmawia tan hna a siam sak a, tawnhriat nei ṭha T. Mawia'n goal chhuah lo mah se a man per avangin Chanmarians tlarhnung an buai hle.

Mahse, Dintharin chance ṭha an neih lain goal an khung lo a, Isak Vanlalpeka'n freekick pet ṭha ṭhin mah se T. Mawia'n a dansak zel a, Chanmari an insiamṭhat theih phah bawk. First half tawp hma chiahin Dintharin ho lam takin freekick an chawi a, Johny Lalremruata pet lut chu captain Rinchhana'n a tauh lut. Keeper Joel B. Lalramchhana a che sual a, Dinthar an hnual phah.

Goal thum dang

Second half-ah Chanmariin an player an thlak kual a, semifinal-a bul ṭan duh vek an nih vangin theihtawp an rawn chhuah, Chhinga tan thutlukna siam a har sawt ang. Michael Lalbiaksanga'n Services captain Christo a rawn thlak a, Tlangmawi tlangval hian minute 70-naah box pawn aṭangin kawh zetin a pet lut.

Hnahthial tlangval PC Rosangzuala pawh a siamtu ringawtah a ṭang bik ta lo a, minute 88-naah an penalty hmuh chu petin keeper Ramchhana bumin goal ngana a khung. Bench aṭanga rawn lut Mesak-a pawhin Serchhip tlangval Johny-a through ball fing chu um lutin mawi takin minute 89-naah a khung.

Chanmariin goal ruk an khung a, semifinal khel turin an inpeih. Final khel tur zawnna hi double leg-a khelh tur a ni a, first leg hi October 24, Zirtawpnia khelh tur niin second leg hi October 28, Thawhlehniah khelh a ni ang.