Enzo-a'n training a zawm

Chelsea midfielder Enzo Fernandez hliam chu a dam hnai niin Blues manager Enzo Maresca chuan a sawi a, Italian coach hian a player pawimawh chuan club training a zawm leh tawh thu a sawi.

Maresca chuan, "Enzo hian training a zawm leh tawh a, Nilaini zana kan inkhelh hmain training vawi khat kan la bak a, chutah chuan a dinhmun dik tak kan hre thei ang.

"Enzo hliam hi ngaihtuahawm a ni hran lo a, mahse, hliam na zawk a neih lohna turin kan ven a ngai a ni," a ti a, a player chu dam tawh mah se, dimdawi taka enkawl a ngaih thu a sawi.

Chelsea hi Brighton & Hove Albion laka 3-1 a an tlawm hnuah insiamṭhain, inelna hrang hrangah match thum a zawnin an chak leh tawh a, Benfica (1-0), Liverpool (2-1) leh Nottingham Forest (3-0) an hneh.

Forest lakah hliam vangin Enzo hi a inlan lo a, zanin dar 12:30-ah Champions League match khel turin Ajax an mikhual zui dawn - kartawpah league match khelh tur an neih zui dawn avangin Maresca-a'n Enzo a dah ṭha a nih pawhin thil awm tak a ni ang.

Hetihrual hian striker Liam Delap-a'n dam lam pan mah se, zaninah a la inlan thei dawn lo a, Benfica lakah Joao Pedro-a'n red card a hmuh avangin a inlan thei dawn lo bawk.

Maresca chuan, "Marc Guiu kan nei a, Tyrique George kan nei bawk. Ty George hi number 9-a lo khel tawh a ni a, Benfica lakah pawh khan kan chhawr. Kan training leh phawt ang a, kan hria ang chu.

"Guiu pawh kan ring tawk a, season hmasa pawh khan Europa Conference League lamah kan chhawr a, EPL match a khel bawk," a ti a, first choice striker pahnih inlan thei dawn lo mah se, duhthlan tur a neih thu a sawi.