Oct 24-ah MPL12 Qualifier

Mizoram chhunga football inelna sang ber Mizoram Premier League khel tur zawnna MPL Qualifier chu October 24, Zirtawpniah khelh a ni dawn. Tun ṭumah hian Aizawl khaw pawn aṭanga tel tur an awm lo a, Aizawl DFA hnuaia club pahnih Ramhlun North FC leh Ramthar Veng FC ten hmunruak pakhat an inchuh ang.

MPL Board chuan MPL12 Playoff khelh hun tur a tichiang nghal a, October 27, Thawhlehniah first leg khelh tur niin November 1, Inrinniah second leg khelh a ni dawn. MPL12-a pasarihna Kanan FC leh qualifier-a chak lo zawkten playoff hi an khel ang.

MPL Qualifier chu

MPL12 handbook-ah chuan MPL khelh theih dan (Promotion) chu a hnuaia tarlan ang hian an inziak.

MFA hnuaia District Football Association hrang hranga division sang ber aṭangin pahnih ṭheuhin MPL Qualifying an khel thei ang. Heng qualifying khel turte hian MPL khel thei tura tehfung (criteria) an zawm a ngai ang. MPL qualifying khel tur te nominate hun hi MFA-in MPL Board kaltlangin District FA te a hriattir ang.

MPL qualifying khelh dan tur chu organising committee (MPL Board or MFA Executive Committee ruat) kutah a awm ang a, chu qualifying-a pakhatna chu MPL khel turin an tling nghal anga; pahnihna erawh chuan season zawh taka MPL hniam ber dawttu (pasarihna) nen double leg in playoff an khel ang a, chuta an chak a nih chuan season tharah MPL an khel thei ang.

Team 2 chauh

MFA hnuaiah district 11 a awm a, Aizawl DFA aṭang chauhin tel an awm. Ramhlun North hi ADFA First Division league winner an ni a, Ramthar Veng hi First Division champion an ni thung.

October 24, Zirtawpni chhun dar 12:30-ah First Division final-a inhmachhawn tawh pahnih te hian qualifier hi an khel ang a, minute 90 chhunga chak zawk an awm lo a nih chaun extra time khelh a ni ang. Chuta chak zawk an la awm loh cheu chuan penalty shootout hmangin MPL khel tur an zawng ang.

Team hnih chauh an tel avangin a vanduai zawk tan pawh MPL khelh theine a inhawng dawn a, MPL12-a pasarihna Kanan FC nen an double leg-in MPL khel tur an zawng ang.