Ram tan Sinner inlan dawn lo

Davis Cup chu November aṭangin khelh ṭan a ni dawn, ram leh ram mipa tennis team hmanga inelnaah hian Jannik Sinner chu a inlan dawn lo - champion lai Italy chu an thiampuipa tel loa an khelh a ngai dawn tihna a ni.

Kum 24 mi Sinner hian kumina khelh Grand Slam paliah final a lut vek - Australian Open leh Wimbledon title a la, tun hnai mai khan Six Kings Slam Exhibition-ah a hlawhtling bawk.

Grand Slam vawi li champion tawh Sinnet hian November 9-16 chhunga khelh tur ATP Finals chu khelh ngei a tum a, mahse Davis Cup erawh khelh a tam ta lo, inelna hi November 18-23 chhunga khelh tur a ni thung ang.

Italy captain Filippo Volandri chuan, "Davis Cup atan Jannik Sinner chu a remchang ve dawn lo," a ti. Davis Cup hnuhnung pahnihah Italy hi an champion thei a, kuminah Sinner tel loin eng ang taka ṭha nge an nih chu a hriat dawn a ni.

Sinner chuan, "Davis Cup 2023 leh 2024-ah kan champion a, tun ṭumah chuan team lam nen kan sawi ho hnuah thutlukna siam a ni. Mimal tak chuan hrehawm pawh ka ti hle, mahse season thar lo awm leh tur ngaihtuah tel a pawimawh.

"Hun rei lote hnuah Australian Open kan khel chhunzawm leh mai dawn a, inelna lian khel tur chuan inbuatsaihna hun ṭha neih a ngai a, kumin tawp lamah hian hun thawl ka mamawh a ni," a ti.

World number 8 Lorenzo Musetti leh number 22 Flavio Cobolli te chu Italy tana hming langsar an ni dawn, quarterfinal-ah Austria an hmachhawn dawn a, inkhel hautak a ni ang.

Sinner a inlan dawn loh lai hian, world number 1 Carlos Alcaraz erawh Spain tan a inlan dawn thung a ni.