Forest manager thar Dyche

Nottingham Forest chuan an manager thar atan Sean Dyche an la lut - Dyche hian tun hmain Burnley leh Everton te a lo enkawl tawh avangin Premier League-ah tawnhriat a nei ṭha tawh hle.

Kum 54 mi Dyche hian kum 2027 nipui thleng daih contract a ziak a, tun kar tawp aṭangin team a kaihruai nghal ang. Forest hian season an hmang ṭha lo, tun season chhungin manager pathum an nei tling der tawh!

Forest hian kar tawp inkhelah Chelsea 3-0 in an hneh lo, an coach Ange Postecoglou an ban zui - Tottenham manager hlui hian Forest hi ni 39 chauh a enkawl hman, hna a thawk rei hman lo hle.

Nuno Espirito Santo thlaktu Postecoglu khan Forest khan match riat a kaihruai hman a, chak ni hmel an hmu miah lo. Vawi ruk tlawmin vawi hnih dang chu an khingpui te nen an inhnehtawk a, table mawngphah lamah an talbuai a ni.

Nottingham Forest chuan thuchhuah siamin, "Naupang a nih laiin Dyche hi Forest tan youth player a lo ni tawh ṭhin, kan club kalphung hria a ni a, tuna kan ṭhat tawk lohna leh siamṭhat ngai laite pawh a hre hneh hle tura ngaih a ni.

"Premier League mai ni loin European football thlengin ṭha taka min kaihhruai theih kan beisei a, club hlutna leh ropuina ang tak kha min phawrhsak theih ngei kan beisei tlat a ni," an ti.

Dyche-a hian coaching staff atan Ian Woan leh Steven Stone te a la tel a, anni pahnih hi player an nih laia Nottingham Forest tana lo khel tawh ṭhin kha an ni bawk.

Forest hian Ningani zanah Europa League khel turin Porto an mikhual dawn a, kartawpah Premier League match khel turin Bournemouth an lenchilh zui leh nghal bawk ang.