Mega Boxing 2025-ah Dinmawia tel dawn

Sailo Agencies-MIZBA Mega Boxing 2025 chu November 14, 2025 hian ṭan a ni dawn a, Mizo boxer ṭha ber zinga mi Laldinmawia'n a tel tur thu a tichiang. Tuipui boxer Dinmawia chuan Mizoram tana a theihna zawng zawng hlan a duh thu Vanglaini a hrilh.

Mega Boxing 2025 hi National Boxing C'ship-a Mizoram aiawh tlanna tur a ni a, hei vang hian Mizoram tan a hlu hle. Dinmawia chuan, "Mizoram tana medal lak ngei ka duah a, chuvangin Mega Boxing hi ka khelh ngei a ṭul a, ka champion ngei pawh ka beisei a ni," tiin Vanglaini a hrilh.

Tuipui boxer hian Senior National Boxing C'ship-ah Mizoram tan silver a la tawh a, Mizo mipa boxer zingah gold la an la awm lo. Chutihrualin Dinmawia hian sub junior, junior leh youth-ah chuan national level-ah gold panga a la tawh. Senior level chhiar telin silver pahnih leh bronze pakhat a hnek chhuak tawh bawk.

India aiawh pawhin Dinmawia hi a feh chhuak tawh a; Ukraine (gold)), Serbia (silver), Uzbekistan(silver) leh Kazakhstan (bronze) ah te medal a la tawh. Mizoram chhunga Dinmawia hian ama weight a thunun ṭhin a, Services-a a luh hma hian 2011 LPS Profight (52 kg), 2012 Mizoram Contender Fight (52 kg - light fly weight) leh 2023 Mizoram Fight Night (56 kg - Bantam weight) ah te a champion tawh a ni.

Dinmawia hi Pune Army Sports Institute-ah a awm a, Services coach hnuaiah training a nei mek. Tuipui boxer chuan, "Kar thum ṭha training-na hun a la awm a, theihtawp ka chhuah dawn. Mizo mipui hmaah boxing hmuhnawm rawn chhawp chhuah ngei ka tum a ni," tiin Vanglaini a hrilh.