Barcelona tan Rashford a vul

Fermin Lopez-a'n hattrick a siam a, a tawpa sawi hlawh zawk erawh goal hnih khungtu Marcus Rashford tho a ni - English forward hi Manchester United-in duh loa an hnawl kha a ni miau a, a chanchinin ngaihven zui a hlawh lo thei lo.

Thawhlehni zan khan Champions League inkhelah Barcelona chuan 6-1 in Olympiakos an sawp a, Rashford-a'n goal hnih a khung - tun season-a Champions League match thum a khelh aṭanga goal li a khungna a ni a, Catalan club tan Rashford a vul zel.

Barcelona khelmuala inkhelah, Catalan club hian first half-ah goal hnih an khung nghal a, Fermin Lopez-a khung ve ve niin, 2-0 in chawlhlawk an hmang.

Second half-ah thil danglam a thleng. Olympiakos striker Ayoub El Kaabi chuan Barca lakah si phurh sut ṭhenna goal a tauh lut a, mahse, referee Urs Schnyder chuan offside vangin goal hi a pawm lo.

Video Assistan Referee (VAR) a inrawlh zui a, referee hian khelmual sirah video a thlir. Offside en tura kal hian Barca defender Eric Garcia chu a lo handball tih ava hmu chhuak a, Greek club hi penalty a pe ta daih - El Kaabi-a'n harsatna nei loin goal-ah a chantir.

Mahse, Greek club-in Barcelona laka comeback beiseina an neih chu a nung rei lo hle. Minute thum a liam a, Olympiakos midfielder Santiago Hezze chu Marc Casado laka a foul avangin a yellow card pahnihna pek a ni a, hnawhchhuah a ni.

Player tam zawka an khelh hnuah Barcelona an nung lehzual sawt a, minute 68-naah Rashford-a'n penalty a hlawh chhuak zui. A pet turin Lamine Yamal a lo pen chhuak a, UCL match 25 a khelh tlin zanah a hlah lo.

Spanish rawlthar duhawm hi kum 18 leh ni 100 mi niin, Champions League-a match 25 khel tling thei naupang ber record a siam a, goal hmangin a record siam a lawm zui.

Barca-in an duhtawk lo - Rashford-a'n goal hnih a khung belh ve leh a, English forward hi number 9-ah khelhtir ni mah se, a khawr lo tih a lang a, a nemnghettu chu goal a ni.

Rashford-a goal hnih khung karah Fermin Lopez-a'n a hattrick siamna goal a khung bawk a, Olympiakos an tho tawh lo chiang hle - Barcelona hian UCL match thum an khelh aṭangin vawi hnih hnehna an chang ta a, point ruk an hmu mek.

Barca boss Hansi Flick chuan Rashford fakin, "Number 9-ah a khel a, a tan a awlsam lo tih ka hria. Inkhel ṭantir lamah press kan harsat deuh a, mahse, chance khati zat a siam a, penalty a hlawh chhuak bawk.

"A pawimawh ber chu goal a khung kha a ni a, ka beisei ang ngeiin 100% min pe a ni," a ti. Barca hian kum 2017-a 6-1 a Paris St-Germain an hneh hnuah, tun hi Champions League-a goal ruk an khung lehna hmasa ber a ni.

Barca tan hian rawlthar duhawm, kum 17 mi lek Dro Fernandez chuan inkhel bul a ṭan a, Catalan club hian hliam vangin Robert Lewandowski, Raphinha leh Dani Olmo an chhawr thei lo a, kartawpah El Clasico an khelh dawn avangin Flick-a'n hliam damkawr Ferran Torres a la dah ṭha bawk.