PSG-in goal sarih an khung!

Champions League nomawi kawltu Paris Saint-Germain-in an champion nomawi humhim an tumna kawngah, tumah indaltir an tum lo - an mikhualna ramah Bayer Leverkusen chu 7-2 ngawtin an sawp.

BayArena-a inkhel hi 'ennawm hmuhnawm' tih loh rual a ni lo. Minute sarihna lekah defender Willian Pacho chuan goal hmahruai a khung a, minute 33-naah Leverkusen captain Robert Andrich hnawhchhuah zui a ni!

Andrich hi Desire Doue a nghawk avangin yellow card pek a ni zet a, mahse, video assistant referee en a nih hnuah red card zawk pek a ni - PSG hi a tam zawk erawh an ni rei lo hle.

Minute 37-naah PSG defender Illia Zabarnyi chu red card pek ve leh niin, Leverkusen-in penalty an hmu bawk - Aleix Garcia-a'n goal-ah a chantir zui a, BayArena thawm chu ring tak a ni.

Mahse, Leverkusen hlim chhung erawh a rei lo. Desire Doue-a'n first half tawp hmain goal hnih a khung a, Khvicha Kvaratskhelia-a'n goal khat khung bawkin, chawlhlawk hman hma hauhin 4-1 a ni fel der.

Second half-ah pawh PSG an insum lo - Nuno Mendes, Ousmane Dembele leh Vitinha ten khung belhin, Leverkusen tana Aleix García goal hnihna chu mualpho zualpui khuhna chauh a tling.

PSG hian Ligue 1-ah hmahruaitu an nihna hloh mah se, UCL table-ah erawh a chung ber an luah mek - match thum an khelh tawhah hnehna an la chang vek a, goal 13 ngawt an khung tling ta der.