Inter Milan-in goal an surtir

Serie A match li zet a zawna chak tawh Inter Milan-in Champions League lamah pawh result ṭha an nei zel a, Thawhlehni zan khan an mikhualna ramah Union Saint-Gilloise chu 4-0 ngawtin an sawp.

Italian club tan Denzel Dumfries, Lautaro Martínez, Hakan Çalhanoglu (penalty) leh Pio Esposito ten goal khat ṭheuh an khung a, hun tawp thlenga goal dang lut loin Inter an chak.

Cristian Chivu enkawl Inter hian first half-ah Dumfries leh Martinez hmang hian goal an khung a, club pahnih player neih dan enin Italian club hi an chak dawn tih a chiang.

Second half ṭan aṭanga minute riatna lekah penalty an hmu zui - Liverpool midfielder Alexis Mac Allister-a unaupa Kevin Mac Allister chuan Martinez-a tauh luh tur chu a kutin a lo dang a, video assistant referee (VAR) rawn a nih hnuah referee-in penalty spot a kawk.

Çalhanoglu-a'n harsatna awm loin goal-ah a chantir a, Esposito-a'n a hmawr rawn bawkin, Belgian club lakah Inter Milan an chungnung hle.

Inter hian UCL match thum an khelh tawhah hnehna an chang vek a, mahse, an hnehte hi Ajax (2-0), Slavia Prague (3-0) leh USG (4-0) te an ni a, inchhuang viau thei an ni lo.

Serie A club hian match nga khelh tur an la neihah Kairat (home) hi chu an hneh leh mai a rinawm a, mahse, Atletico Madrid (away), Liverpool (home), Arsenal (home) leh Borussia Dortmund (away) an la hmachhawn dawn a, a harsa ang.

Hetihlai hian an hneh tak Union SG erawh match hnih a zawna an tlawmna a ni a, he team hian match hmasa berah rin loh takin PSV Eindhoven (3-1) hneh mah se, Inter hma hian Newcastle United lakah 4-0 thoin an lo tlawm tawh bawk a, match nga khelh tur an la neihah Atletico Madrid, Galatasaray leh Bayern Munich te an la tel avangin a awlsam dawn lo.