Kompany kan contract thar

Bayern Munich manager Vincent Kompany chuan contract a ziak thar a, German champion nen hian kum 2029 June thleng thawk dun turin an inrem a ni.

Kompany hian kum 2024 May aṭang khan Bavarians hi a enkawl a, an inremna hmasa kha kum 2027 nipui thleng atan tih a ni, tunah chuan kum hnih dang atan an inrem belh.

Kum 39 mi Kompany kaihhruaina hnuaiah Bayern Munich hian season hmasa khan Bundesliga nomawi an chawi a, inelna hrang hrangah match 67 a khelhpui aṭangin vawi 49 hnehna a chanpui a ni.

Belgian manager Kompany chuan, "Ka chunga rinna nghat ngamtu Bayern Munich chungah ka lawm takzet. Ka awm rei hnuah club ka hrechiang telh telh a, hun rei zawk ka cham thei tur hi ka lawm, ka tawn chin ringawt pawh thil lawmawm tam tak a ni tawh.

"Tawnriat nuam leh duhawm tak tak ka nei tawh a, tuna kan tawn bak hlawhtlinna dang tawn leh zel pawh ka duh a, kei leh ka nauten theihtawp kan chhuah chhunzawm ang," tiin a sawi.

Bayern Munich hian tun season bul ṭan nan German Super Cup an la fel tawh a, tun dinhmunah Bundesliga hmahruaitu an ni mek bawk - anmahni hnaih bertu RB Leipzig aiin point ngain an sang zawk.

German club president Herbert Hainer chuan, "Hun rei zawk atana Vincent Kompany inremna kan neih pui chhan chu, a lakah rinna kan nghah bakah kan hma hun atan beiseina sang tak kan neih vang a ni.

"Vincent hi player a nih laiin a ropui a, hlawhtlinna tam tak a chang - a sulhnu ṭha takte avangin player ten an zah bawk. Hmasawn duh mi a ni a, a hnathawh reng rengah a rilru zawng zawng a hmang bawk," tiin a sawi.

Player a nih laiin Kompnay hi Manchester City captain a ni a, City tan match 360 khelin Premier League nomawi pawh vawi li ngawt a lakpui a, manager a nih hnuah pawh a hlawhtling chhunzawm mek a ni.