Newcastle United an chak leh ta

Premier League-a beisei phak lo Newcastle United-in Champions League-ah tal result ṭha neih an tum a, Thawhlehni zan khan Jose Mourinho enkawl Benfica chu 3-0 in an hneh.

Magpies tan hian Harvey Barnes chuan goal hnih khungin, Anthony Gordon-a'n goal khat a thawh bawk a, mikhual Portuguese club-in a chhanletna tur an neih loh avangin an tlawm.

Newcastle hian match thum an khelh tawhah vawi hnih hnehna an chang ta chiah a, an match hmasa berah Barcelona (2-1) ngam lo mah se, Union Saint-Gilloise (4-0) leh Benfica (3-0) an hneh zawn.

Hetihlai hian Benfica erawh an 'puja' a fuh hleithei lo a, Chelsea boss hlui Mourinho kaihhruaina hnuaiah UCL match hnih khel tawhin, an tlawm ve ve.

Mourinho an rawih hma hian match khat khel hmanin, an hneh ngei tura ngaih Qarabag chu mahni mualah ngei 2-3 in an ngam lo - Mourinho hnuaia an tlawmna match hnih erawh Chelsea (1-0) leh Magpies (3-0) lakah a ni a, khualmual ve ve a ni bawk.

Benfica hian Mourinho hnuaiah league match li khel tawhin, vawi hnih chiah an la chak a, vawi hnih draw an nei - league table-ah pathumna an ni mek a, UCL-ah match nga khelh tur la nei mah se, an hmachhawn turte hi Bayer Leverkusen (home), Ajax (away), Napoli (home), Juventus (away) leh Real Madrid (home) te an nih avangin a awlsam lo ang.