MPL12-ah goal 200 lut tling dawn?

GIG Motors MPL12-ah goal 197 a lut tawh a, goal 200 lut turin goal thum chauh a ngai tawh. Vawiinah goal 200 a luh tlin a rinawm hle. Aizawl FC striker Zomuansanga'n goal 16 a khung tawh avangin top scorer a nih ngei a rinawm tawh a, amah hnaih bertu Suanngaihmuana'n goal 12 khung mah se Saikhamakawn an tlak tawh avangin a khung belh dawn tawh lo.

Aizawl FC winger Vincent Lalduhawma'n goal kua a khung tawh a, Baktawng tlangval tan pawh Zomuana elpui a harsa tawh ang. Dinthar lamin goal ruk khung tawh pahnih an nei a, MPL1 best player R. Laldanmawia leh MPL1 best forward MS Dawngliana ten goal ruk ve ve an khung. MLS aṭangin M Lalpektluanga'n goal ruk a khung tawh a, Chanmari player zingah goal ruk khung tling an la awm lo.

Chanmari hian goal khung tam bik player nei lo mah se player 14 zetin goal an khung tawh a, goal 32 khung tawhin Aizawl FC dawta goal khung tam ber an ni. Aizawl FC hian goal 40 an khung a, player pariatin goal an khung tawh. a; Zomuansanga, Vincent Lalduhawma, Malsawmzuala Tlangte, Lalawmpuia Sailo leh Laltlanzova te goal thum an khung tling vek tawh bawk.