Chelsea rawlthar rual an vul e!

Champions League-ah Chelsea-in rawlthar rual an ring a, an mikhual Ajax lakah an inthlahrun phah lo - goal nga ngawt an khung a, Dutch team hi 5-1 ngawtin an lo sawp.

Blues coach Enzo Maresca-a'n kartawpah league match khelh tur an la nei tih hriain, Ajax lakah an ṭhat dan bera inrem kher ṭulin a hre lo a, bench-ah Reece James, Marc Cucurella, Pedro Neto leh Alejandro Garnacho te ho an awm vek.

Chelsea striker Liam Delap chu hliam vangin a chawl mek a, Benfica laka hnawhchhuah João Pedro a inlan thei lo bawk. Inkhelh hmain Blues manager Enzo Maresca-a'n kum 19 mi ve ve Marc Guiu leh Tyrique George a neih thu a sawi a, fans tam takin an ring ngam lo - mahse, Ajax lakah goal an khung ve ve!

Guiu hi season ṭan dawn khan Premier League kai thar Sunderland-ah loan-in a kal hman a, mahse, Delap inhliam vangin Chelsea hian an ko kir. Ajax lakah inkhel bul a ṭan a, minute 18-naah goal hmahruai a khung nghal.

Kum 19 mi striker-in goal a khung hma hian Ajax captain Kenneth Taylor chu hnawhchhuah a ni a, Stamford Bridge-a inkhel an nih bawk avangin player tam zawka khel Blues dinhmun a ṭha hle.

Guiu hi goal a khung chiah hian Champions League-a Blues tana goal khung thei naupang ber a ni hman a, mahse, a record hi minute 33 bak a chelh hman lo - kum 18 mi Estevao Willian chuan first half hun pek belhah penalty a chhuih lut.

Mahse, Brazilian forward-in goal a khung hma hian right back-a chhawr Caicedo leh Enzo Fernandez (penalty) ten Blues tan an khung belh hman a, Ajax tan Wout Weghorst chuan penalty hmang vekin a khung bawk - chawlhlawk an hman hian Blues hian 4-1 in hma an hruai tawh!

Second half-ah Guiu thlaktu George chuan khelmualah minute thum chiah hun a hmang hman tihin a khung ve leh a, goal dang lut tawh loin Chelsea hi 5-1 ngawtin an chak - Champions League match thum an khelhah vawi hnih an chakna chiah a ni.

Chelsea tana inlan zingah player 10 ngawt chu kum 21 hnuai lam an ni a, Ajax laka bul ṭantute kum chawhrual hi kum 22 leh ni 163 niin, Champions League-a English club tana bul ṭantu player-te kum chawhrual a tlem pahnihna a ni - kum 16 dawn liam ta khan Arsenal chuan Olympiakos lakah hei aia naupang rawlthar rual an lo tlar tawh!

Blues tan kum 17 mi Reggie Walsh pawh bench aṭanga luhtir niin, Chelsea tana UCL-a inlan thei naupang ber record a siam a, English player ang zawng erawh chuan Arsenal tana kum naupang têa lo inlan tawh Jack Wilshere a tluk lo thung.

Chelsea boss Enzo Maresca-a'n a squad-ah kum 16 mi Ryan Kavuma-McQueen pawh a dah tel a, mahse, England Under 17 international erawh khelmualah minute pek a ni lo.