Real-in Juventus an hneh

El Clasico khel tura inbuatsaih mek Real Madrid chuan 1-0 in Juventus an hneh a, La Liga match thum an khelh tawhah an chak vek laiin, Juve erawh match thum an khelh tawhah chak an la nei lo thung!

Real tan Jude Bellingham chuan inkhela goal awmchhun a khung a, Italian club-in a chhanletna tur an nei ve lo. Inkhel ṭantir lamah Juve an ṭang thei viau a, Real goalkeeper Thibaut Courtois-a'n hna a ngah.

Mahse, inkhel a rei tawlh tawlh a, Real an hmuhnawm tawlh tawlh. Spanish club tan Kylian Mbappe pawhin chance hlauhawm a nei a, mahse, Juve keeper Michele Di Gregorio a paltlang thei bik lo.

Goal lut loin chawlhlawk hman a ni a, minute 57-naah Real-in an khung ta thung - Vinicius Jr-a'n post pet perin, a per lehlam hi Bellingham chuan goal-ah a chantir a, inkhel tawp thlenga goal dang lut loin Real an chak.

Bellingham hian dar hliam vangin season bul a ṭan thei lo a, a lo kir hnuah pawh ngai a awh lo - Real tan match thumah chiah bul la ṭanin, match li chu bench aṭangin a lut a, Europe-ah phei chuan Juve hma hian minute 10 chiah a la khel!

Mahse, kum 22 mi midfielder hian a thiam a la theihnghilh lo tih pholangin Juve lakah a khel ṭha a, goal a khung bawk. Real Madrid boss Xabi Alonso pawhin a midfielder hi a fak hle.

Alonso chuan, "Jude khan goal a khung a ni mai lo a, game pumpui thlir khan a khel ṭha thlawt a ni. Kar hmasaah Getafe lakah a khel a, a khel ṭha takzet - chu ai chuan zaninah a khel ṭha leh ta zawk.

"Inel nuam ti mi a ni a, elpui team tana hlauhawm thlen thei player a ni a, goal a khung avangin ka lawmpui hle. Tlarhmaa a hmawr bawk turin theihna a nei a, a hnung lam ven a thiam bawk. Khawvela player complete ber pawl a ni," a ti thlawt - Bellingham tan hriat a nuam ang.

Hetihlai hian Juve erawh UCL match thum an khelh tawh aṭangin point hnih chiah an la nei a, Serie A match match sarih khelh tawhah vawi thum chiah la chakin, table-ah pasarihna an ni bawk - coach Igor Tudor tan pressure a na lehzual a, ban theih dinhmunah a ding mek.