Tottenham leh Monaco inhnehtawk

Nilaini zan Champions League inkhelah Tottenham Hotspur chu an mikhualna ramah AS Monaco nen 0-0 in an inhnehtawk a, point khata an lungawi a ṭul.

Stade Louis II-a inkhelah, tun hnaia sawisel hlawh Spurs goalkeeper Guglielmo Vicario a che ṭha hle, chawlhlawk hma pawhin an lama lut tur chu vawi li ngawt mai ṭha tak takin a dang hman.

Italian keeper Vicario hian Arsenal forward hlui Folarin Balogun leh Maghnes Akliouche te khung tur chu ṭha zetin a dansak a, second half-ah pawh player hmuhnawm leh pawimawh a ni chhunzawm.

Monaco tan Liverpool midfielder Takumi Minamino pawhin ṭum thum ngawt mai hun ṭha a neih a chhawr ṭangkai thei lo vek a, mikhual team tan point khat hmuh chu chanchin lawmawm bik a ni ngei ang.

Spurs manager Thomas Frank chuan, "Monaco khan kan khel ṭha zawk tih chu ka hria, kan keeper Vicario khan fak phu khawpin a khel ṭha fal bawk. Inkhel ṭhenkhatah hi chuan mahni goal venhim kan ngaih pawimawh a ngaih chang a awm," a ti.

Monaco manager Sebastien Pocognoli chuan, "Lawmna tur leh lawm lohna tur a awm, kan chak zawh loh avangin pawi ka ti a, kan khelh dan pumpui thlir erawh chuan a lawmawm," tiin a sawi a, a naute chu a chhuang hle tih a sawi bawk.

UCL match thum an khelh tawh chinah Monaco hian point hnih an hmu a, table-ah 27-na an ni; Spurs erawhin point nga hmu tawhin 15-na dinhmun an luah thung.