Record thar siamtu Osimhen

Victor Osimhen-a goal hnih hmangin Galatasaray chuan Bodo/Glimt chu 3-1 in an hneh a, kum 2012 December hnuah Champions League bika a zawna an chak lehna hmasa ber a ni.

Nigeria forward hian goal hnih a khung bakah Yunus Akgun tan a siamsak. Osimhen hian European football inelna sang berah hian a zawnin match sarih chhung goal a khung ta - Galatasaray player zingah hetiang ti thei hmasa ber a ni a, tun hma lama record lo chelh tawhtu Burak Yilmaz chu a khum ta chiah.

Norwegian champion Bodo/Glimt tan hian hun tawp dawn lamah substitute Andreas Helmersen chuan goal khat a khung a, mahse awmzia a nei phak tawh lo a ni.

Galatasaray striker Victor Osimhen chuan, "Goal ka khung emaw khung lo emaw pawh ni se, ka team Galatasaray tan hian player ṭangkai leh ṭha nih hi ka thil tum a ni a, goal leh assist neih tel phei chu duhthusam a ni bawk," a ti.

Galatasaray hian Osimhen bakah Leroy Sane pawh an nei a, European football inelna sangah pawh team lian dangte barakhaih thei turin theihna an nei.