Nadal hmachhawn tur Nick Kyrgios

Australian Open khelh laiah inkhel hmuhnawm leh en châkawm bik a awm dawn, world number 1 Rafael Nadal leh tualchhung tlangval Nick Kyrgios te chu vawiin tlai hian last 16-ah an intawng ang.

Inrinni khan player pahnih hian third round an khel a, seeded pakhatna Nadal hi Pablo Carreno Busta lakah nuamsa taka a chak laiin, inkhel hnuhnung zawkah Kyrgios chu Karen Khachanov nen harsa taka set nga an khelh hnuah a tlang hram.

Inelna dang ang lo takin Nadal-a'n kuminah service a nei ṭha viau a, seeded 27-na Carreno Busta tan thawk lakna hun a siam­sak lo; nuamsa tak 6-1, 6-2, 6-4 in hnehna a chang.

Grand Slam vawi 19 champion tawh hian winners vawi 42 a vuakchhuah theih laiin, a tih dik loh vanga a khingpuiin point a hmuh (unforced errors) chu vawi sarih chauh a ni. Kum 33 mi Nadal chuan, "Tun inelna ka hmachhawn tawh zinga ka khelh ṭhat ber a ni. Khua a lum a, ball a sawt sangin bo­ruakah a awm rei, khatiang kha ka tan chuan inkhelh nawmna a ni. Service leh forehand kha ka chakna hnar a ni bawk," a ti.

Theihna nei sang, mahse nungchang ṭhat loh vanga nih tur ang ni pha lo Nick Kyrgios a hmuhnawm lehpek hle. Australian tlangval hian darkar li leh minute 26 an inkhelh hnuah Karen Khachanov chu 6-2, 7-6 (7-5), 6-7 (6-8), 6-7 (7-9), 7-6 (10-8) in a hneh.

Kum 24 mi Kyrgios chuan, "Match ka khelh tawh zinga hautak leh hahthlak berte zinga mi a ni," a ti. A service neih ṭhat a hmang ṭangkai a, vawi 33 ngawt aces a siam thei - Nadal tan fimkhur a ngai dawn. Kyrgios leh Nadal te hi tun hmain vawi sarih an inkhel tawh, tawnhriat nei hnem Nadal-a'n vawi li hnehna a chang. An intawn hnuhnung ber chu season hmasa Wimbledon kha niin Nadal hi set li an khelh hnuah a chak.

Champion thei tura rinkai zinga mi Dominic Thiem, Alexander Zverev leh Daniil Medvedev te pawhin an khingpui ṭheuh hnehin third round an paltlang a, kuminah Australian Open champion thar hmuh theih beiseina a la nung.

Seeded pangana Dominic Thiem hian inkhel inhnehtawk takah Taylor Fritz 6-2, 6-4, 6-7 (5-7), 6-4 in a hneh a, match dawt lehah Gael Monfils a hma­chhawn ang. French tlangval hian Ernests Gulbis 7-6 (7-2), 6-4, 6-3 in a lo hneh ve thung a ni.

US Open finalist Medvedev tan Alexei Popyrin hneh turin harsatna a awm lo, 6-4, 6-3, 6-2 in a chak. Last 16-ah erawh Grand Slam vawi thum champion tawh Stan Wawrinka a hmachhawn dawn avangin hna a hautak tawh ang.

Alexander Zverev-a'n Fernando Verdasco chu 6-2, 6-2, 6-4 in a hneh a, seeded 11-na David Goffin erawh tun hnaia match 15 chak zawn tawh Andrey Rublev lakah 2-6, 7-6 (7-3), 6-4, 7-6 (7-4) in a chak lo thung.