Dinthar FC tan Aizawl FC an ṭha hret

GIG Motors MPL12 semifinal first leg-ah Aizawl FC-in nimin tlai khan Dinthar FC 2-0 in an hneh a, inkhel an thunun tel avangin second leg khelh tur la awm mah se final lut turin an dinhmun an ṭha hle. I League club tan Malsawmzuala Tlangte leh Zomuansanga ten goal an khung a, Khawbel tlangval Zomuana hian tun season-ah MPL club pasarih lakah goal a khung vek.

Semifinal second leg hi October 28, Thawhlehni zan dar 7:00-ah khelh a ni dawn a, Maimawms tan beisei tur a la awm. Team pahnih hi minute 180 chhunga an inhnehtawk a nih chuan extra time khelh a ni ang a, an la inhnektawk cheu a nih chuan penalty shootout hmanga chak zawk zawn tur a ni.

Dinthar thar

Aizawl FC-in Police laka hrem vanga khel lo Zomuana bul an rawn ṭan tir a, an starting eleven-ah thil danglam a awm lo. Chutihrualin league round-a khel tam zawk Laldawngzuala aiah Freddy Lalruatkima chu right back-a dah a ni.

Dinthar lam erawhin Chanmari FC laka an mualpho avangin starting eleven an thlak hlawk. An veng tlangval Michael K. Lalhriatpuia'n captain hna a rawn chelh a, defender rinrawl Lalhmangaihsanga pawh bench-ah dahin goalkeeper Joel B. Lalramchhana aiah Zosangliana a rawn lut.

Maimawms coach Laldampuia'n Aizawl FC laka result ṭha neih tumin ngaihtuahna a seng a, player chauh ni loin an khelh dan pawh a rawn thlak. Dinthar hian ṭan phat aṭangin an rawn nawr a, goal venhim tawp an tum lo.

Football hmuhnawm

MPL semifinal-ah entu ṭhahnem tawk lo mah se inkhel erawh a hmuhnawm takzet. Zo Clasico-a mualpho Maimawms nasa takin an rawn insiamṭha a, Aizawl FC nen an inkhel tawk hial. Mahse, R. Lalruatfela kaihhruai team erawh an danglam - player tinin an tih tur an chiang a, an tlarhmate an hriam bawk avangin an chance a neih a hlauhawm zel.

Zomuana'n league round-ah Dinthar lakah a khung lo a, semifinal-ah khung tum viau mah se first half bikah goal hmaah a vannei tawk lo. Mahse, Lunglei Zobawk tlangval Sawma Tlangtein a theihna sang tak rawn pholangin box pawn aṭangin minute 26-naah kawh zetin a pet lut.

Aizawl FC midfielder pathum Eric Remruatpuia Chhangte, Lalawmpuia Sailo leh K. Vanlalhriatzuala ten an hna an tlin hle. Minute 56-naah pawh OmOma ke aṭanga inṭanin Sawma Tlangte leh Lalrempuia te hnathawh rah chu Zomuana'n a seng a, striker goal a ni. Khawbel goal machine-in goal 17 a khung ta.

I League club-in goal dang an khung belh lo a, chutihrualin Dinthar pawhin goal khung theihna an nei tho. Lalkhawpuimawia'n box chhung aṭangin a volley goal lo a, Dawngtea pawhin second half-ah penalty area pawn aṭangin ṭha zetin pet mah se Aizawl FC captain Hriatpuia'n a dang.

Aizawl FC 2-0 in an chak a, final lut turin dinhmun ṭha mah se Dinthar tan hnualna tur a la awm lo. Goal khat lekin inkhel kalhmang a ti danglam thei a, Dampuia hoten second leg-ah I League club barakhaih an tum ang.