RG Stadium-ah Olympian Tori West

Australian Olympian leh heptathlete Tori West chuan vawiin tlai 4:00 hian RG Stadium-ah amah hmu tura inziaklut Mizo infiammite kawmna hun a hmang dawn. Kum 30 mi Tori West hian Mizo infiammite a thlawnin training a pe dawn a ni.

Tori West hian heptathlon-ah 2024 Paris Olympics-ah Australia ai a awh a, kum 2020 leh 2025 khan Australian champion a ni. Mizoram athlete tan Olympic thlenga tawnhriat nei tawhin training pe tura Aizawl a rawn pan thei hi chanchin lawmawm a tling.

Kum 2020 khan Equil Labs a din a, CEO a ni nghal. Equil Labs hian infiammiten an dinhmun inhriatna tur app 'Peak' an siam a, infiammiten Peak hmang hian an dinhmun an chhinchhiah thei a, mahni dinhmun inhriat hi training dan tur ruahman nan a pawimawh hle.

Mizoram chuan Olympic 2036-a Mizo infiammi tel theih dan zawngin turin ruahman a siam chho mek a, Tori West hmalak pawh hi Olympic Vision 2036 zingah a tel. Australian Olympian hi Mizoram State Sports Council leh Mizoram Athletics Association te nen an thawk dun a ni.