Mo hi mihring ve tho a ni - Slot

Liverpool boss Arne Slot chuan tun hnaia beisei phak lo, sawisel hlawh tak Mohamed Salah a chhan a, a player chuan goal a la khung leh vat tur thu a sawi.

Slot chuan, "Player-te chuan chance hlah chang an nei ve ṭhin alawm. Mo hi mihring ve tho a ni a, hetianga goal a khung loh hi kan hmuh khât em avangin kan hrethiam lo mai mai a ni," a ti.

Dutch coach chuan sawi zawmin, "Liverpool tan goal a khung fo ṭhin a, a khung leh vat ang tih pawh ka ringhlel lo. Salah hian hei leh chen goal a lo khung tawh a, a khung leh vat ang.

"Squad siksawi a awm lo thei lo a, chutah chuan ka player-te zawng zawngin insiamrem an mamawh vek a ni," a ti a, Salah chuai ta anga an sawi mai chu a pawm ve loh thu a sawi.

Liverpool hian zanin dar 12:30-ah league match khel turin Brentford an lenchilh dawn a, league match thum a zawna an tlawm tawh avangin chak an mamawh hle.

Mahse, Reds hian Nilaini zan khan Champions League-ah Eintracht Frankfurt chu 5-1 a sawpin inrintawkna an nei leh tawh. He inkhela hliam vanga lakchhuah Jeremie Frimpong a inlan thei rih dawn lo a, Alexander Isak erawh hliam tenau neiin, Frankfurt laka hahdam Ryan Gravenberch nen zanina an inlan theih dawn leh dawn loh a chiang lo.