Napoli mualah Inter Milan

Serie A champion lai Napoli chuan zanin dar 9:30 hian Inter Milan an lo mikhual dawn - Italian team ṭha pahnih hian point 15 ve ve an hmu mek, champion tum an nih avangin an pahnih intawnna hi a pawimawh.

Antonio Conte naute hian kar laihawl Champions League inkhelah PSV Eindhoven chu 6-2 in an hneh lo, an mualphona lak aṭanga thawhchhuah nghal an tum ang. Inter Milan erawh Union Saint-Gilloise 4-0 a hneh thei an nih avangin inrintawkna an nei sang ang.

Inter Milan hian season bul kha an ṭan fuh lo, an match hmasa pathum zinga pahnihah an tlawm. Mahse, a zawnin vawi li an chak leh thei tawh a, team ṭha leh nghet an ni leh tawh, an ṭha tawk em, tih chu Naples club lakah hian fiah a ni dawn.

Cristian Chivu-a enkawl Inter tan Lautaro Martinez chu hmanraw hlauhawm a ni leh dawn a, hliam vangin Marcus Thuram erawh a inlan theih a la rinawm loh. Argentine striker Martinez hi Napoli tlarhnung tana ven ngun ngai bik a ni ang.

Napoli hian nipui laiin Kevin de Bruyne leh Rasmus Hojlund te an la lut a, an inkawp rem. Anni pahnih bakah hian season hmasa an champion theih chhan zinga mi Scott McTominay an nei, anni pahthum hi an khelh fuh chuan Inter hneh turin theihna an nei.