Villa-in City mikhual dawn

Manchester City chuan Pathianni zan dar 7:30 hian Premier League match khel turin Aston Villa an lenchilh dawn a, tun season-a 'form' tak Erling Haaland-a'n en bik a hlawh leh ang.

Pep Guardiola enkawl City hian an league match hmasa berah 4-0 ngawtin Wolverhampton Wanderers sawp mah se, Tottenham Hotspur (2-0) leh Brighton & Hove Albion (2-1) lakah an tlawm zui avangin season hmasa an talbuaina aṭanga la insiamrem lo anga sawi thawm a ri ring hman hle.

Mahse, City hian Manchester derby-ah Manchester United chu 3-0 a sawp zuiin, an league match hnuhnung pangaah tlawm an nei leh tawh lo a, vawi li hnehna changin, vawi khat an khingpui an inhnehtawkpui.

Champions League match thum an khelhah pawh tlawm an nei lo. Match hnih chakin, match khat an draw a, tun dinhmun an thleng theih nan hian Haaland-a'n a thawh hlawk hle.

Norwegian striker hian tun season inelna hrang hrangah match 11 khelin goal 15 a khung tawh a, Villa lakah pawh khung a tum leh ang. Hetihrual hian Villa hi an league match hmasa pangaah chak zo lo mah se, match thum a zawnin an chak leh tawh a, Europa League-ah rin loh takin GA Eagles an ngam lo thung.