McLaren kha inring rawh u - Hamilton

Lewis Hamilton chuan Formula 1 season tawp lam inum boruak a thlir a, a chung lama awm McLaren driver pahnih Oscar Piastri leh Lando Norris te chu Max Verstappen laka fimkhur turin a chah.

Pathianni zan dar 1:30 hian Autódromo Hermanos Rodríguez-ah Mexican Grand Prix an tlan dawn. Piastri hian amah hnaih bertu Norris lakah point 14-in hma an hruai, pathumna Verstappen nen point 40-in an inthlau thung.

Champion lai Verstappen hi season tir leh a laihawlah a che ṭha tawk lo, tun hnaiah erawh intlansiak hnuhnung pali zinga pathumah hnehna a chang a, a chak loh ṭum pawhin pahnihna a ni thei bawk.

Intlansiak hmabak panga an la nei. Hamilton chuan, "Max-a che ṭha kaltluang hi chu midang tan dan theih a ni ngai lo, a dan theih dan awmchhun chu amah ang bawka chaka tlan a ni tawh mai. Kawng dang a awm lo.

"McLaren driver pahnih zinga tu emaw zawk hi an champion rinna kha a lian hman, an chet dan chhutin a mak lo bawk. Mahse, tun hnaia thil thlen dan en erawh chuan anni pahnih pawh hi fimkhur taka an tlan a ngai dawn a ni," a ti.

Ferrari driver Hamilton tan champion beiseina a awm tawh lo, champion lai Verstappen-a'n a hma a awm mek McLaren driver pahnih pawh thlak a tum chho hi a hmuhnawm a, car intlansiak ngaina tute tan a hlu hle.