Dyche enkawl Forest an chak

Nottingham Forest chuan an manager thar Sean Dyche enkawlna hnuaia an match hmasa berah hnehna an chang - Ningani zan Europa League inkhelah Forest hian FC Porto chu 2-0 in an hneh.

Forest hian season bul an ṭan fuh lo hle a, tun season atan Dyche hi an manager pathumna a ni hial. Dyche-a'n hna a zawm hnua chanchinbu mite a kawmna hmasa berah, "Goal khung tumin kan nawr ang," tiin a sawi a, a sawi angin an nawr nghal.

Premier League club hian goal khung tur erawhin vanneihna an mamawh tel. Minute 19-naah Morgan Gibbs-White chuan penalty aṭangin goal hmahruai an khung, an goal hnihna Igor Jesus-a khung pawh penalty aṭang thoin a ni bawk.

Kum 54 mi Sean Dyche chuan, "Stadium chhungah min ṭan tute an rawn pungkhawm a, anni khan a tir aṭanga a tawp thlengin min thlawp ṭha hle. Khelmual chhunga khelten an tih tur an hlen chhuak vek bawk," a ti.

Forest hi an ṭha nghal vek tihna erawh a la ni kher lo, Pathianni zanah EPL khel turin Bournemouth an lenchilh dawn, chumi hnuah Manchester United an mikhual tur chu fiahna a ni ang.

Europa League inkhel dangah Aston Villa chu Go Ahead Eagles lakah 2-1 in an chak lo. Unai Emery naute hian a zawna Europa League-a vawi thum chak an tumna chu an tihlawhtling thei lo - Pathianni zan dar 7:30-ah Manchester City an mikhual zui leh dawn a ni.