Mizoram tan Olympian Tori West

Australian Olympian leh heptathlete Tori West chuan Inrinni tlai khan RG Stadium-ah Mizo infiammite a kawm a, infiammi ṭhahnem tak an kalkhawm. West hian tun ṭuma Mizorama training a rawn pek hi a thlawn vekin a ni a, ama sum seng vekin a rawn zin bawk. Mizoram infiammite tana West inpekna hi a ropui hle.

Kum 30 mi West hi Olympian a ni ringawt lo a, inelna sang la hmachhawn lai a ni. Tun ṭumah pawh hian Commonwealth Games 2026 atan a inbuatsaih pah a, heptathlon-ah medal lak a inbeisei pha. MSSC coach Vanlalawmpuia Fanai chuan, "Tori West hi heptathlete a ni a; heptathlon-ah chuan infiamna pasarih 100 metres hurdles, high jump, shot put, 200 metres, long jump, javelin throw leh 800 metres a awm a, heng infiammnaahte hian training a pe thei vek," tiin a sawi a, Australian Olympian-in Mizo naupang training a pe chu mumang ram a an hial thu a sawi.

West hian October 21, Thawhlehni khan Aizawl a rawn thleng a, a rawn thlen ni aṭangin MSSC naupang hnenah training a pe nghal. November 4, Thawhlehni thleng Aizawlah a awm dawn. Mizorama a rawn kal theih nan hian content creator Kip Crossing te nupa an pawimawh a, West leh Kip te hi ṭhian ṭha tak niin Aizawlah Kip-a te inneih a rawn hmang tawh a, tun hi a rawn kal vawi hnihna a ni.

Mizoram chuan Olympic 2036-ah Mizo a tam thei ang ber an tel theih nan 'Vision 2026' a kalpui a, Tori West pawh hi tawnhriat leh inpekna pawh hi Vision 2036 hlawhtlinna theihna kawngah a pawimawh. West chuan, "Mizo naupangte hian theihna an nei a, mahse tuna in facilities ang chuan Olympic chu an thleng lo ang. Tun aia inthuam ṭhat hret a pawimawh a, zana training theihna turin 'light' awm thei se a duhawm hle," tiin Vanglaini a hrilh.

West hi athlete a nih bakah software engineer a ni a, kum 2020 khan Equil Labs a din a, CEO a ni nghal. Equil Labs hian infiammiten an dinhmun inhriatna tur app 'Peak' an siam a, infiammiten Peak hmang hian an dinhmun a hriat theih a, Mizo infiammiten a thlawn vekin an hmang thei dawn a ni.