Chanmariin MLS lakah an phuba an la

GIG Motors MPL12-ah Chanmari FC-in Zirtawpni zan khan semifinal first leg-ah MLS FC 2-0 in an hneh a, final lut turin an dinhmun a ṭha. I League club hian league round-ah Lawngtlai club hi an hneh lo tawh a, knockout stage-ah phuba an la a, inkhel erawh a la zo lo.

Semifinal hmasa zawkah Aizawl FC-in 2-0 bawkin Dinthar FC an hneh a, I League club pahnih final-a an intum theihna kawng a inhawng zau ta hle. Semifinal second leg hi October 28, Thawhlehni hian RG Stadium-ah khelh a ni dawn a, final khel tur a chiang thuai dawn. Final hi November 1, Inrinni zana khelh tur a ni.

Johny leh Sawmsanga

MPL best midfielder nominee-ah Johny Lalremruata a lang a, Serchhip Vengchung tlangval hian semifinal-ah a theihna pholangin minute 12-na lekah freekick aṭangin goal hmahruai a khung. Freekick hi Sawmsanga hlawhchhuah a ni a, Johny-a'n freekick pet ṭha bawk mah se MLS keeper Rosangliana'n a hna a tlin lo.

Chanmariin goal khung hmasa mah se MLS khel pawh a nung ṭha a, Freddy Lalrinkima leh HC Willis Byhna te chu I League club tlarhnung tan an hnawksa pha. Lawngtlai club hi an vanduai ve bawk a, Chanmari freekick pet luhna hi referee-in a ham nem ve hretah a ngaih theih.

Mizoram Police laka chakna goal khungtu Willis-a'n box chhungah K. Lalruatdika'n a pet chungin a tlu duh lo a, goal-ah pet mah se keeper Zothanmawia'n a dang. Willis hi tlu se chuan penalty a hlawh chhuak ngei ang.

Chanmari theihna sanzia a lang zui a, vawi tam an in pass kual hnuah keeper T. Mawia pein College Veng keeper pet chhuah chu Sawmsanga'n ṭha taka a lak thlak hnuah a pet goal. Minute 28-naa goal luh danah best forward nominee a tel Sawmsanga'n fak a phu a, chutihrualin MLS tlarhnung an muthlu ve bawk.

Beisei tur la awm

MLS-in second half-ah goal khung thei lo mah se an khelh dan thlirin final luh beiseina a la awm. Willis Byhna-a'n Chanmari keeper T. Mawia tan hna a rawn siam bakah Siaha Vengpui tlangval hian hnai tak aṭangin goal zawnah a tauh thei lo.

Lalruatliana Sailo-in bench aṭangin Vanlalhruaitluanga a rawn luhtir a, Siaha Meisatla hi dead ball-ah a hlauhawm. Hruaitea hian freekick aṭangin crossbar a pet per a, a freekick pet hnuhnung zawk pawh Freddy-a'n tauhin T. Mawia'n a dang ṭha hle.

October 28, Thawhlehni tlai dar 4:00-ah MLS leh Chanmari ten second leg an khel dawn a, Lawngtlai club-inṭawiawmtu an mamawh. First leg-ah Lawngtlai mipui an ṭhahnem a, thawm an nei ring lo. Second leg-ah erawh player 12-na an ni tih hriain tho chhuak turin thawm ring zawk an neih a ṭul ang.