Mizoram khingpui tur Odisha

Sub Junior Boys National Football Championship chu vawiin aṭangin Amirtsar, Punjab-ah khelh ṭan a ni dawn a, Mizoram hian hian tlai dar 3:00-ah Odisha a hmachhawn ang. Group A-ah Mizoram hi Manipur, Odisha leh Bihar te nen an awm ho a, group khat aṭangin pakhat chauh an tlang dawn avangin K. Lalrindika hote tan hna a awlsam dawn lo.

Tukin zing dar 9:00 hian Manipur leh Bihar an inkhel bawk ang. Mizoram hian group stage an paltlang an tum a nih chuan group C-a pakhatna an hmachhawn ang. Group C-ah hian Karnataka, Assam, Uttar Pradesh leh West Bengal te an awm a ni.

Mizoram Foobtall Association leh Reliance ṭangkawp chuan hun rei tak chhung Naupang League an khelh tawh bawk avangin tun ṭumah hian a rah a lang chho tura ngaih a ni. Mizoram team hi Dika bakah manager Lalrinchhana Fanai, asst coach C. Lallawmzuala leh physio Angie Lalramngaihawmi ten an ho a ni.