Amorim-a 'Man United' a tho chhuak ta

Manchester United-in Inrinni zan khan inkhel hmuhnawm tak khel chungin Brighton & Hove Albion 4-2 in an hneh a, Old Trafford-ah hlima au thawm a ri leh ta. Ruben Amorim-a hote match thum a zawnin an chak a, season liam ta champion Liverpool chungah an awm.

Nipui bazara lakluh Matheus Cunha-a'n goal hmahruai a khung hnuah Casemiro leh Bryan Mbeumo ten an khung belh. Mualneitu hi 3-0 a hma an hruai hnuah Brighton beiseina siam turin Danny Welbeck leh Charalampos Kostoulas ten khung mah se Mbeumo-a'n chak nemnghetna goal a khung.

Lawmna tur hlir

Brazilian forward Cunha-a'n nung takin inkhel bul a ṭan a, a phu angin goal a sual chhuak ve ta bawk. Minute 24-naah Cunha hian Casemiro ball pek chu box pawn aṭangin goal kilah a dah a, team tana thawkrim satliah ni loin a 'class' tel.

Amorim-a hote inkhel a hmuhnawm a, minute 34-naah Casemiro ball petin Brighton player a per hnuah goal-ah a lut. Portuguese manager-in Brazilian midfielder hi a luh ṭantirhin duh lo mah se tunah erawh United midfield khaipa a ni a, Real Madrid vanglaia midfielder pawimawh a nih chhan kha a rawn lantir leh ta.

Benjamin Sesko pawhin goal khung lo mah se minute 61-naah Mbeumo goal khung tur a siamsak a, no. 9 hna a tlin viau. Mahse, Amorim-a pawh a famkim bik lo a, subsititution a tifuh tawk lo.

Bench aṭanga rawn lut Patrick Dorgu freekick chawi vangin Danny Welbeck-a'n mawi zetin minute 73-naah a khung. Injury time-ah substitute Joshua Zirkzee-a'n corner kick-ah Kostoulas a veng hneh lo a, Brigton striker hian a tauh luh avangin Seagulls-in beiseina an neih phah.

Mahse, United hian goal venghim mai loin an nawr ngam a, injury time-ah Mbeumo-a'n goal ṭha zetin a khung. Mbeumo ball petu hi Ayden Heaven a ni a, chutihrualin mawi zeta lo dummy-tu Bruno Fernandes-a 'IQ' a sang hle. Old Trafford-ah mipui thawm a ring a, inkhel a nung a, Premier League-ah chauh an insawrbing dawn avangin champion sawi rik pawh thil awm lo a ni lo.

Engtin zel?

Man United hian goalkeeper Senne Lammens inlan hnuah an la chak vek a, tlarhnungah Liverpool laka chakna goal khungtu Harry Maguire hliam vanga a khel thei lo chungin Matthijs de Ligt-a'n a ai a awh zo; Leny Yoro leh Luke Shaw te pawh an rintlak. Amad Diallo-a'n hma a sawn zel a, chutihrualin entu mipui thawm a ṭha takzet bawk.

Amorim pawhin, "Goal thum kan khung zawha mipui thawm kha thil pangngai a ni lo. Old Trafford-a khatiang thawm ka hriat hmasak ber a ni a, kan hun tawna nuam ka tih ber a ni," tiin a sawi. Man United hian kuminah Nottingham Forest (Nov 1), Tottenham (Nov 8), Everton (Nov 24), Crystal Palace (Nov 30), West Ham (Dec 4), Wolves (Dec 9), Bournemouth (Dec 13), Newcastle United (Dec 27) leh Wolves (Dec 31) te an hmachhawn dawn a, table chung lama insawhngheh turin an dinhmun a ṭha hle.