Chelsea an la puitling tawk lo

Ajax lakah 5-1 in an chak zo chauh a, an phur vanglai takin Chelsea an tlawm leh tawh - Blues hian kai thar Sunderland chu an khelmualah 2-1 in an ngam lo a, nomawi beisei turin an la puitling tawk lo tih a lang nawn.

Blues tan Alejandro Garnacho chuan Stamford Bridge a pan hnua a goal hmasa ber khung mah se, a team chakpui nan a tawk zo lo a, Black Cats hian Wilson Isidor hmangin si phurh an sut.

Team pahnih hi 1-1 in an inhnehtawk tawh mai dawn niin a lang hman a, mahse, hun pek belhah Sunderland tan Chemsdine Talbi chuan goal khung ve lehin, Black Cats hi 2-1 in hnehna a chanpui ta daih.

Blues tan beiseina

Chelsea-in Sunderland an hmachhawn hmain inelna hrang hranga an match hnuhnung paliah a zawnin hnehna an chang a, Sunderland lakah pawh minute lina lekah goal an khung avangin an chak leh ngei dawn niin a lang.

Pedro Neto-a ball pek chu Garnacho chuan ṭha taka tlan luhpuiin, Stamford Bridge-a pan hnua a goal hmasa ber ni turin a khung a, thawm chu ring tak a ni.

Mahse, Blues thawm rin chhung a rei lo hle. Minute 22-naah mikhual team-in si phurh an sut a, throw ball aṭanga ball kal chu Chelsea tlarhnungin an pet chhuak thei lawk lo a, heta ṭang hian Isidor chuan si phurh sutna goal a khung.

Tlarhma bil

Chelsea boss Enzo Maresca-a'n tlarhmaah Garnacho, Joao Pedro, Pedro Neto leh Marc Guiu a inkawp tir a, beisei angin Blues tan chance hlauhawm tia chhiar tur an insiam hleithei lo.

Guiu-a'n Ajax lakah goal khung mah se, kum 19 mi tan EPL-a club lian tana number 9 mawhphurhna rihzia a lang nawn a, tun hnaia beisei anga khel thei lo Joao Pedro a la nil tluang zel.

Bench aṭanga luhtir Estêvão Willian pawhin Blues tlarhma a tinung zo lo a, Reece James leh Marc Cucurella ten box chhungah ball thlawh lut ṭhin mah se, awmze neia lo chhuah thei striker an awm lo.

An nau

Chelsea player-ten goal an khung belh thei lo a, a tawpah chuan hremin an awm. Lutsharel Geertruida chuan bench aṭanga lut Brian Brobbey tan ṭha zetin ball a thlawh lut a, Brobbey hian a luhpui.

Blues centre back Trevoh Chalobah leh Josh Acheampong ten ball chhuhsak tum mah se, Brobbey-a'n ball a dinpui a, chak taka lo tlan lut Talbi tan a pe - kum 20 mi forward hian tawih zetin goal-ah a chantir.

Sunderland an chak a, table-ah pahnihnaah an invawrh chho a, Chelsea erawh pariatnaah an la awm - nizan inkhel result a zirin table erawh a la danglam leh ang.