Inter Milan hnehtu Napoli

Serie A champion lai Napoli chuan an nomawi chuhpuitu zinga mi Inter Milan chu 3-1 in an hneh. Antonio Conte naute hian Italian football inelna sang berah a chung ber dinhmun an luah nghal bawk a ni.

Inrinni zan Stadio Diego Armando Maradona-a inkhelah, mualneitu tan Kevin de Bruyne, Scott McTominay leh Frank Anguissa ten goal khat ṭheuh an khung a, mikhual tana Hakan Calhanoglu-a penalty chhuih luhin awmzia a nei thui tawh lo.

Napoli chungnung

A tir aṭangin inkhel a hmuhnawm nghal, mikhual lamin goal an nawr na hle. Inter captain Lautaro Martinez chuan hun ṭha a nei a, mahse hnai tak aṭangin khung inbeisei mah se Napoli goalkeeper Vanja Milinkovic-Savic a paltlang thei lo.

Chawlhlawk hmain Henrikh Mkhitaryan chuan Giovanni di Lorenzo a tih tluk avangin penalty a chawi a, a pet tura rawn ding chhuak De Bruyne chuan a hlah lo, mahse a pet zo chiah hi a malpui a hliam a, thlak a ngai nghal zui bawk.

Inkhel chawhnu lamah thil a danglam tam lo, midfielder McTominay chuan hla tak aṭanga a ball kang hmuh chu a insiamrem pui dawn emaw tih laiin box pawn aṭangin a pet pawp a, goal kilah a lut - goal ṭha bik zinga mi a ni.

Napoli defender Alessandro Buongiorno-a'n a handball vangin penalty a chawi a, a pettu Calhanoglu-a'n a hlah lo; beisei nei sang chho viau mah se Anguissa chuan Naples club chak nemnghehna a rawn khung leh ta zawk.

Lawm leh lawm lo

Tun hnaiah Napoli an che ṭha tawk lo, an match hnuhnung sarih zinga paliah an tlawm avangin Inter Milan lakah pawh an fimkhur. Conte chuan, "Ka hmu dan chuan Italy rama team ṭha ber nen kan inhmachhawn.

"Inter hian point an hloh nual tawh a ni mai thei, mahse squad chhah ṭha tak an ni. Chutiang lakah chuan point thum kan hmu a ni a, kan inkhelah khan duhthusam lo lai chu awm mah se lawmna tur a tam hle," tiin a sawi a, hliam an neih fo avangin fimkhur a ngai tih a sawi bawk.

Inter Milan coach Cristian Chivu chuan, "Player ka nih lai leh ka tun hma hun an sawi fo a, kei chuan tun hun hi ka ngaipawimawh ber. Italy ramah hian football kan thlir dan a danglam a ngai, inkhelah hian thutlukna dik lo thleng a awm fo.

"Penalty kan chawi dawn te kha kei chuan a holam deuh niah ka ngai, a hnua sawisel leh ai chuan thutlukna dik kha awm mai se la kan ṭhatpui zawk ang," a ti a, Italian football huang chhungah match official lamin thusual an nei fo ṭhin niin a sawi bawk.

Milan an chelh

Serie A nomawi lak tum ngam zinga mi AC Milan an chak zo lo, an mikhual Pisa nen 2-2 in an inhnehtawk. San Siro-a inkhelah, Milan hian a tirah Rafael Leao hmangin khung mah se Pisa lamin Juan Cuadrado leh M'Bala Nzola te hmangin an changlet.

Hun tawp dawnah Zachary Athekame hmangin Milan hian an sut leh hram a, point khat hlu tak an hlawh chhuak. League match riat an khelh aṭanga point 17 hmuin an chungah point 18 hmutu Napoli an awm thung a, an inthlauhna chu point khat chauh a ni.

Milan manager Massimiliano Allegri chuan, "Goal kan khung hmasa zawk a, a hnuah khan khung belh theihna remchang pawh kan insiam nual. Goal khat dang kha khung chhunzawm ni ila chuan harsa vak loin kan chak thei mai ang, mahse chutiang chu kan ti thei tlat lo," a ti.

AC Milan hian Thawhlehni zanah Atalanta an lenchilh zui leh nghal dawn; kar tawp Serie A inkhel dangah Atalanta leh Cremonese te chu 1-1 in an lo inhnehtawk ve thung a, point khatah an lungawi a ṭul a ni.